कोल्हापुरात तुफान पाऊस, पंचगंगेने धोका पातळी गाठली, पूरसदृश परिस्थितीची शक्यता

नयन यादवाड, कोल्हापूर : २०१९ आणि २०२१ मध्ये कोल्हापूर जिल्ह्यात आलेल्या महापूराची आठवण अजून देखील ताजी असतानाच आता याची पुनरावृत्ती होण्याच्या मार्गावर असून पंचगंगेने आपलं रौद्ररूप दाखवण्यासाठी सुरुवात केली आहे. पंचगंगेने आज सकाळी ८ च्या सुमारास आपली धोका पातळी ओलांडली असून पुराचं पाणी आता हळू हळू शहरात शिरण्यास सुरुवात होत आहे. याशिवाय धरण पाणलोट क्षेत्रात सुरू असलेल्या मुसळधार पावसामुळे राधानगरी धरण १०० टक्के भरले असून राधानगरी धरणाचे ४ स्वयंचलित दरवाजे उघडले असून तब्बल ७२१२ क्युसेक्स पाण्याचा विसर्ग भोगावती नदीपात्रात सुरू आहे. यामुळे पंचगंगेच्या पाणी पातळीत आणखी वाढ होण्याची शक्यता निर्माण झाली आहे. यामुळे यंत्रणादेखील अलर्ट झाली असून ज्या भागात पुराच्या पाण्याचा शिरकाव होतो त्या भागातील नागरिकांचे स्थलांतर सुरू करण्यात आले आहेत. तर अनेक मार्गांवर पाणी आल्याने वाहतूक विस्कळीत झाली आहे.

पंचगंगेने धोका पातळी गाठली

जिल्ह्यात गेल्या आठवड्याभरापासून पावसाची जोरदार बॅटिंग सुरू आहे. परिणामी जिल्ह्यातील सर्व नद्या दुथडी भरून वाहू लागल्या आहेत. पंचगंगा नदीने सोमवारी २२ जुलै रोजी आपली इशारा पातळी गाठून धोका पातळीकडे वाटचाल सुरू केली होती. पंचगंगेने गुरुवारी सकाळी ८ च्या सुमारास आपली धोका पातळी ओलांडली असून सध्या पंचगंगा ४३ फूट २ इंचावरून वाहत आहे. आज सकाळी आठच्या सुमारास राजाराम बंधारा येथे पंचगंगेची पाणी पातळी ४३ टक्के इतकी होती तर जिल्ह्यातील तब्बल ८४ बंधारे पाण्याखाली गेले आहेत. परिणामी जिल्ह्यातील जनजीवन विस्कळीत झाले असून कोल्हापूरकर पुन्हा एकदा चिंतेत पडले असून जिल्ह्यात पुन्हा एकदा पूरसदृश परिस्थिती निर्माण होऊ लागली आहे.
Kolhapur Panchaganga River: कोल्हापूर गगनबावडा मार्ग बंद, पुरसदृश्य परिस्थितीमुळे यंत्रणा अलर्ट, धाकधूक वाढली; कुटुंबियांचे स्थलांतर, विद्यापीठाच्या सर्व परीक्षा रद्द

राधानगरी धरणाचे स्वयंचलित दरवाजे उघडण्याची शक्यता

शहरात बुधवारी दिवसभर पावसाची ये-जा सुरू होती. मात्र धरण पाणलोट क्षेत्रात पाऊसाचा जोर कायम होता. यामुळे राधानगरी धरणात मोठ्या प्रमाणात पाण्याची आवक सुरू आहे. परिणामी राधानगरी धरण देखील १०० टक्के भरले असून राधानगरी धरणाचे ४ स्वयंचलित दरवाजे उघडले असून स्वयंचलित दरवाजा क्रमांक ३, ४ , ५ आणि ६ मधून ५७१२ क्युसेक्स तर पॉवर हाऊस मधून १५०० असे एकूण ७२१२ क्युसेक्स पाण्याचा विसर्ग भोगावती नदीत सुरू आहे. यामुळे भोगावतीसह पंचगंगा नदीच्या पाणी पातळीत आणखी वाढ होण्याची शक्यता नाकारता येत नसल्याने नदीकाठच्या लोकांना सतर्कतेचा इशारा प्रशासनाने दिला आहे.
Kolhapur Rains Update: कोल्हापुरात पावसाचा हाहाकार; पंचगंगेची धोका पातळीकडे वाटचाल, स्थानिकांना सतर्कतेचा इशारा

याशिवाय खबरदारी म्हणून कर्नाटक राज्यातील अलमट्टी धरणातून देखील बुधवारी सायंकाळी २ लाख ५० हजार क्युसेक्स इतका विसर्ग सुरू करण्यात आला असून कोल्हापूरचे आमदार सतेज पाटील यांनी देखील कर्नाटकचे मुख्यमंत्री सिद्धरामय्या आणि उपमुख्यमंत्री डी के शिवकुमार यांची भेट घेऊन अलमट्टी धरणातून आणखी पाण्याचा विसर्ग वाढवावा, यासाठी निवेदन दिले आहे. यामुळे काही काळ कोल्हापूर आणि सांगलीकरांना दिलासा मिळू शकतो.
Kolhapur Rain Update: कोल्हापूरला पुराचा धोका? पंचगंगा धोक्याच्या पातळीच्या दिशेने, जिल्ह्याला आज ऑरेंज अलर्ट; नागरिकांचे स्थलांतर सुरु

कुटुंबांचे स्थलांतर सुरू

पंचगंगा नदीने दोन दिवसांपूर्वीच आपली इशारा पातळी गाठली होती. यानंतर जिल्ह्यात सुरू असलेल्या मुसळधार पावसामुळे प्रशासनाने तत्काळ खबरदारी घेत पंचगंगेने धोका पातळी गाठल्यानंतर महापुराचा फटका बसणाऱ्या चिखली, आंबेवाडी, आरे यासह शिरोळ तालुक्यातील काही गावातील नागरिकांना तत्काळ स्थलांतरित होण्याच्या नोटिसा बजावल्या होत्या. त्यानुसार जिल्ह्यातील ४८३ हून अधिक नागरिकांचे स्थलांतर करण्यात आले असून पंचगंगेने आपली इशारा पातळी गाठली की सर्वात आधी महानगरपालिका हद्दीतील सुतारवाडाभागात पाणी शिरते. यामुळे येथील १७ कुटुंबांना महानगरपालिकेने तयार केलेल्या चित्रदुर्ग मठ येथील निवारा केंद्रात स्थलांतरित करण्यात आले आहे. तसेच महापुराचा फटका बसणाऱ्या गावातील हजारो जनावरांचे देखील स्थलांतर करण्यात आले असून ठिकठिकाणी निवारा केंद्र, चारा छावण्या, आरोग्य यंत्रणा उभारण्यात आल्या आहेत.
Rain Alert: मुंबईत तुफान पाऊस, पुढील ४८ तास मुसळधार, पाहा कुठे रेड, कुठे ऑरेंज अलर्ट?

रस्ते वाहतुकीवर परिणाम

पंचगंगेने आपली धोका पातळी ओलांडली असून जिल्ह्यातील अनेक मार्गांवर पाणी आल्याने या मार्गावरील वाहतूक बंद आहे तर अनेक ठिकाणी पर्यायी मार्गाने वाहतूक वळविण्यात आली आहे. यामध्ये १० राज्य मार्ग, २७ प्रमुख जिल्हा मार्ग, जिल्हा परिषदेकडील ९ तर ग्रामीण भागातील २२ असे ८० हून अधिक मार्ग प्रभावित झाले आहेत. कोल्हापूर गगनबावडा मार्गावर पाणी आल्याने ही वाहतूक बंद असून कोल्हापूर-रत्नागिरी महामार्गावर देखील पाणी आल्याने वाहतूक दुसऱ्या मार्गाने वळविण्यात आली आहे. तसेच बुधवारी रात्रीच्या सुमारास याच महामार्गावर पंचगंगा नदीचे पाणी आल्याने वाघबीळ ते छ. शिवाजी पूल (NH १६६) हा रस्ता वाहतुकीसाठी बंद करण्यात आला असून रत्नागिरीला जाण्यासाठी दाणेवाडी (वाघबील)-पन्हाळा रस्ता-मडळे-साडले कासारवाडी-टोप किंवा बोरपडले-धावकडी-नवे पारगाव-तळसांडे- वाठार टार्फ वडगाव या पर्यायी मार्गाचा वापर करण्याचे आवाहन करण्यात आले आहे. तर पुणे बेंगलोर राष्ट्रीय महामार्गाला जोडणारा कसबा बावडा शिये या मार्गावर ही पाणी आल्याने वाहतुकीसाठी बंद करण्यात आला असून दुसऱ्या मार्गाने वाहतूक अद्याप सुरू आहे.
Pune Khadakwasla Dam: पुणेकरांनो सांभाळा! परिस्थिती आणखी भीषण होण्याची शक्यता, खडकवासलातून आणखी पाणी सोडणार

विद्यार्थ्यांच्या परीक्षा रद्द तर गोकुळच्या दूध संकलनात देखील घट

दरम्यान, जिल्ह्यात सुरू असलेल्या मुसळधार पावसामुळे आणि वाहतुकीवर परिणाम झाल्याने याचा प्रभाव शिक्षण क्षेत्रावरही झाला आहे. शिवाजी विद्यापीठातील तंत्रज्ञान अधिविभाग वगळता सर्व विभागांच्या २५ ते २७ जुलै या कालावधीत होणाऱ्या सर्व परीक्षा स्थगित केल्या असल्याचे विद्यापीठाच्या वतीने कळवण्यात आले असून नवीन तारखा लवकरच जाहीर करण्यात येतील असेही सांगण्यात आले आहे.

शिवाय गावातील वाहतूक बंद असल्याने याचा थेट परिणाम दूध संकलनावरही झाला असून कोल्हापूर जिल्हा दूध उत्पादक संघ अर्थात गोकुळच्या दैनंदिन दूध संकलनात १५ ते २० हजार लीटरने घट झाली असून वाहतूक व्यवस्था कोलमडल्याने दूध संकलनालाही फटका बसला आहे. तर जिल्ह्यात कुठेही आपत्ती आल्यास जिल्हा आपत्ती व्यवस्थापन विभागाच्या नियंत्रण कक्षाशी संपर्क करण्यासाठी टोल फ्री नंबर १०७७ जारी करण्यात आला असून ०२३१-२६५९२३२, ०२३१ २६५२९५०, ०२३१- २६५ २९५३, ०२३१-२६५ २९५४ हे नंबर देखील जारी करण्यात आले आहेत.