कुटुंबासोबत पिकनिकला गेला, पण ती सहल शेवटची ठरली; तलावाच्या किनारी अघटीत घडलं

जितेंद्र खापरे, नागपूर : नागपुरात वेगवेगळ्या घटनेत दोघांचा बुडून मृत्यू झाल्याची घटना समोर आली आहे. पहिल्या घटनेत नागपूर जिल्ह्यातील सावनेर पोलीस ठाण्यांतर्गत येणाऱ्या कमलेश्वर तालुक्यातील मांडवी शिवारात फार्म हाऊस येथे नरेश रेवतकर या व्यक्तीचा तलावात बुडून मृत्यू झाला. नरेश हे नरखेड येथील रहिवासी असून कुटुंबासह तो पिकनिकसाठी आला होता. त्याचं कुटुंब काही आनंदाचे क्षण घालवण्यासाठी या फार्म हाऊसवर आलं होतं. पण कदाचित नशिबात काहीतरी वेगळंच होतं. संपूर्ण कुटुंब सहलीसाठी एकत्र आलं होतं, पण सर्वजण आनंदाने परतले नाहीत.

कुटुंबासोबतचा तो दिवस अखेरचा ठरला…

एक दिवसाची सहल आणि कुटुंबासह प्रेक्षणीय स्थळं आटोपून घरी परतत असताना नरेश पाय धुण्यासाठी जवळच असलेल्या एका तलावात गेला. त्याच किनाऱ्यावर त्याचं कुटुंब त्याची येण्याची वाट पाहत उभं होतं. मात्र पाय धूत असताना नरेशचा पाय घसरला आणि तो पाण्यात पडला. हे पाहून कुटुंबियांनी आवाज देत त्याला वाचवण्याचा प्रयत्न केला, मात्र ते सर्व अपयशी ठरले आणि पाण्यात बुडून नरेशचा मृत्यू झाला. या घटनेची माहिती कुटुंबियांनी सावनेर पोलिसांना दिली.
Thane Crime News : पत्नीने पहिल्या लग्नापासूनच्या मुलाची माहिती लपवली, बाळाला घरी घेऊन येताच पती संतापला, चिमुकल्यासोबत क्रूर कृत्य
त्यानंतर पोलिसांनी घटनास्थळी पोहोचून नरेशचा बराच वेळ शोध घेतला, मात्र मात्र अंधारामुळे तो सापडला नाही. दुसऱ्या दिवशी स्थानिक गोताखोरांच्या मदतीने नरेशचा मृतदेह बाहेर काढण्यात आला. या अपघातामुळे नरेशच्या कुटुंबियांना मोठा धक्का बसला आहे. या अपघाताच्या काही वेळापूर्वी त्याने आपल्या कुटुंबासह फोटोही काढले होते.

पाणकोंबडी पकडण्यासाठी गेला आणि…

दुसऱ्या घटनेत सक्करदरा पोलीस ठाण्याच्या हद्दीत सक्करदार तलाव इथे पाणकोंबडी पकडण्यासाठी गेलेल्या २८ वर्षीय तरुणाचा तलावात बुडून मृत्यू झाला. याप्रकरणी पोलिसांनी अकस्मात मृत्यूची नोंद केली आहे. रवी उर्फ नानू सोहनलाल पंचेश्वर (रा. भांडेप्लॉट) असं तरुणाचं नाव आहे. घरी त्याचा मोठा भाऊ आणि आई असून तो मोलमजुरी करत होता. पोलिसांनी दिलेल्या माहितीनुसार, सोमवारी सक्करदरा तलावाच्या हॉटेल बॉलिवूड सेंटर पॉइंटच्या मोडकळीस आलेल्या इमारतीच्या काठी पाणकोंबडी पकडण्यासाठी तो तलावात गेला होता.
Man Ends Life : गल्ली ते दिल्ली उंबरे झिजवले, पण आधारवरील जन्मतारीख बदलेना; डिप्रेशनमधील तरुणाचं टोकाचं पाऊल
दरम्यान यावेळी तलावाच्या चिखलात त्याचा पाय अडकला आणि तो गटांगळ्या खाऊ लागला. त्यावेळी तिथे असलेल्या एका लहान मुलाने हा प्रकार पाहताच या घटनेची माहिती आजूबाजूचा नागरिकांना दिली. त्यानंतर परिसरातील नागरिक त्याला वाचवण्यासाठी तिथे पोहोचले, पण तोपर्यंत तो पूर्ण बुडाला होता.

त्यानंतर या घटनेची माहिती पोलिस नियंत्रण कक्षाला देण्यात आली. नियंत्रण कक्षाकडून माहिती मिळताच सक्करदरा पोलीस घटनास्थळी पोहचून अग्निशमन दलाच्या मदतीने मृतदेह बाहेर काढण्यात आला. उत्तरीय तपासणीसाठी शासकीय मेडिकल रुग्णालयात पाठवण्यात आला. याप्रकरणी पोलिसांनी आकस्मिक मृत्यूची नोंद करून तपास सुरू केला आहे.