वरच्या मजल्यावर कुटुंबीय, तळमजल्यावरील रुग्णालयात डॉक्टरनं स्वत:ला संपवलं, सातारा हादरलं

सातारा: कर्जाच्या कटकटीमुळे एका डॉक्टरने दवाखान्यातच आत्महत्या केल्याची धक्कादायक घटना कराड तालुक्यातील ओंड येथे घडली. डॉ. हेमंत रेळेकर असं आत्महत्या करणाऱ्या डॉक्टरचं नाव आहे. त्यांनी दवाखान्यातच गळफास घेऊन आत्महत्या केल्याची माहिती आहे. खासगी सावकार आणि फायनान्स कंपनीच्या लोकांनी त्रास दिल्याने त्यांनी आत्महत्या केल्याचा आरोप त्यांच्या नातेवाईकांनी केला आहे. या प्रकरणात कराड ग्रामीण पोलिसांत गुन्हा दाखल झाला असून पोलीस तपास करत आहेत.

नेमकं काय घडलं?

याबाबत मिळालेली माहिती अशी की, ओंड (ता. कराड) येथील डॉक्टर हेमंत प्रभाकर रेळेकर (वय ५०) यांनी बुधवारी सकाळी आपल्या दवाखान्यातच गळफास घेत आत्महत्या केल्याची धक्कादायक घटना समोर आली आहे. ही घटना समजताच वैद्यकीय क्षेत्रामध्ये एकच खळबळ उडाली आहे.
Crime News: माझ्याशी बोल, मला भेट, नाही तर मी डीपीवर चढेन! तरुणी धमक्यांना कंटाळली अन् नको ते घडलं
कराड तालुक्यातील बाजारपेठेचे गाव म्हणून ओंड गावची ओळख आहे. या ठिकाणी डॉ. हेमंत रेळेकर आणि त्यांच्या पत्नी डॉ. दिपा रेळेकर हे अनेक वर्षांपासून आपला वैद्यकीय व्यवसाय करत होते. ओंडोशी रस्त्यावर त्यांचे रेळेकर हॉस्पिटल आहे. तर पहिल्या मजल्यावर ते आई, पत्नी, मुलगा, मुलगी असे परिवारासह रहात होते.

घटनास्थळावरुन मिळालेली माहिती अशी की, बुधवारी (१ ऑगस्ट) सकाळी डॉ. हेमंत रेळेकर यांनी आंघोळ केली आणि कपडे परिधान करून ते नेहमीप्रमाणे आपल्या दवाखान्यात आले. त्यानंतर बराच वेळ झाला ते घरी पतरले नाही. हेमंत रेळेकर घरी न आल्याने त्यांच्या कुटुंबीयांनी दवाखान्यात जाऊन पाहिलं. तेव्हा दवाखाण्यात त्यांना दवाखान्यातलीच एका खोलीमध्ये डॉ. हेमंत रेळेकर हे गळफास घेतलेल्या अवस्थेत दिसून आले. हे पाहताच कुटुंबीयांनी एकच आक्रोश केला. त्यानंतर पोलिसांना याबाबतची माहिती देण्यात आली.

दरम्यान, सदरची घटना समजतात दुपारी १२ च्या सुमारास कराड तालुका पोलीस घटनास्थळी दाखल झाले. डॉ. हेमंत रेळेकर यांनी आत्महत्येसारखं टोकाचं पाऊल का उचललं. याबाबत सध्या काहीही माहिती समोर आलेली नाही. तर, सावकार आणि फायनान्स कंपनीच्या लोकांनी त्रास दिल्याने डॉ. रेळेकर यांनी हे टोकाचं पाऊल उचलल्याचा आरोप कुटुंबीयांनी केला आहे.