Nagpur News:’…म्हणून मी जीवन संपवतोय!’ व्हॉट्सअपवर स्टेट्स ठेवून शेतकऱ्याने कवटाळलं मृत्यूला; घटनेनं खळबळ

म. टा. प्रतिनिधी, नागपूर : शेतीची परस्पर विक्री केल्याची माहिती मिळाल्याने तणावात असलेल्या शेतकऱ्याने शेतातील झाडाला गळफास घेऊन आत्महत्या केली. ही घटना हिंगणा पोलिस ठाण्याच्या हद्दीतील आमगाव देवळी येथे घडली. चौकशीदरम्यान पोलिसांनी सहा जणांविरुद्ध आत्महत्येस प्रवृत्त केल्याचा गुन्हा दाखल केला.

राहुल दत्तूजी गोमासे (वय ३७) असे मृतकाचे नाव आहे. याप्रकरणी हिंगणा पोलिसांनी सहा जणांविरुद्ध आत्महत्येस प्रवृत्त केल्याचा गुन्हा दाखल केला. सचिन लकडे (वय ३८, रा. रुई पांजरी), सुरेंद्र शेंडे (वय ६८), हेमंत भोयर (वय ३१, रा. देवळी सावंगी), कवडू भोयर (वय ५५), प्रभाकर लेकुरवाडे, प्यारे पठाण (वय ५२) अशी गुन्हा दाखल करण्यात आलेल्यांची नावे आहेत. जयश्री राहुल गोमासे (वय २६, रा. आमगाव देवळी) यांनी दिलेल्या तक्रारीवरून हा गुन्हा दाखल करण्यात आला.

सहा जणांनी परस्पर शेती विकली

२०१७मध्ये जयश्री यांचे राहुलसोबत लग्न झाले. त्यांना यशस्वी नावाची सहा वर्षांची मुलगी व तीन वर्षांचा कार्तिक नावाचा मुलगा आहे . गोमासे कुटुंबाची मौजा वायफळ रिठी येथे ३.६६ हेक्टर शेती आहे. ही शेती सहा जणांनी राहुलला न माहिती करता परस्पर विकली . त्यामुळे तो तणावात राहायला लागला. १२ मार्चला पहाटे राहुल हा शेतात गेला. त्याने शेतातील झाडाला दोरी बांधून गळफास घेतला . याप्रकरणी हिंगणा पोलिसांनी आकस्मिक मृत्यूची नोंद केली. चौकशीदरम्यान पोलिसांनी सहा जणांविरुद्ध आत्महत्येस प्रवृत्त केल्याचा गुन्हा दाखल केला .

पती, पत्नी और वो… प्रियकरासोबत प्लॅन केला; मध्यरात्री पत्नीचे पतीसोबत भयंकर कृत्य, घटनेने यवतमाळ हादरले
व्हॉट्सअॅप मेसेज करून संपविले जीवन

‘सहा जणांनी माझी शेती परस्पर विकली. मलाच पैशांची मागणी करीत आहेत . मी आत्महत्या करतोय’, अशा आशयाचा व्हॉट्सअॅप मेसेज राहुलने पत्नी व बहिणीच्या मोबाइलवर आत्महत्येपूर्वी पाठविला. या मेसेजमध्ये त्याने सहा जणांची नावे लिहिली . या मेसेजच्या आधारे पोलिसांनी सदर गुन्हा दाखल केला. याप्रकरणात पोलिसांनी सहा जणांविरुद्ध गुन्हा दाखल केला आहे.