फॉर्च्यूनरची धडक, महिला दुभाजकावर फेकली गेली, भीषण अपघातात प्राध्यापिकेचा मृत्यू

विरार: अकोल्यात भरधाव कारने एका कुटुंबाला धडक दिल्याने दुचाकीवरील महिला आणि नऊ महिन्यांच्या लेकीचा मृत्यू झाल्याची धक्कादायक घटना ताजी असतानाच आता विरारमध्येही अंगावर काटा आणणारा अपघात घडला आहे. भरधाव टोयोटा फॉर्च्यूनर कारच्या धडकेत एका प्राध्यापिकेचा मृत्यू झाल्याची भीषण घटना घडली आहे. फॉर्च्यूनरने जोरदार धडक दिल्याने अपघात होऊन या प्राध्यापिकेला आपला जीव गवमामा लागला आहे. आत्मजा कासट (वय ४५) असे मृत प्राध्यापिकेचे नाव आहे. या घटनेने परिसरात सर्वत्र हळहळ व्यक्त केली जात आहे.

राज्यात दररोज अपघाताच्या नवनवीन घटना समोर येत असून भरधाव कारचालकांच्या चुकीमुळे नागरिक अपघातात आपला जीव गमावत आहेत. अशीच काहीशी एक घटना विरार परिसरात घडली आहे. भरधाव कार चालकाच्या धडकेत पायी जाणाऱ्या एका प्राध्यापिकेला आपला जीव गमववा लागला आहे.
Hit And Run: पु्न्हा हिट अँड रन, भरधाव कारची बाईकला धडक, पत्नी अन् ९ महिन्यांची चिमुकली डोळ्यांसमोर गेली

पायी जात असताना मागून कारची धडक अन् प्राध्यापिका दुभाजकावर जाऊन आदळल्या

विरार परिसरातील गोकुळ टाऊनशिप येथील रहिवासी असलेल्या आत्मजा कासट (वय ४५) या विरार येथील विवा कनिष्ठ महाविद्यालयात प्राध्यापिक म्हणून कार्यरत होत्या. महाविद्यालय सुटल्यानंतर सायंकाळच्या सुमारास त्या नेहमीप्रमाणे आपल्या गोकुळ टाऊनशिप येथील घराकडे पायी चालत निघाल्या होत्या.

आत्मजा कासट या पायी चालत जात असताना पाठीमागून आलेल्या भरधाव फॉर्च्यूनर कारने त्यांना जोरदार धडक दिली. भरधाव कारच्या धडकेत आत्मजा कासट दुभाजकावर फेकल्या गेल्या. त्यामुळे त्या गंभीर जखमी झाल्या. विरार येथील मुलजीभाई मेहता शाळेनजीक गुरुवारी सायंकाळी साडेपाच वाजताच्या सुमारास हा भीषण अपघात घडला.

कारच्या धडकेत गंभीर जखमी झालेल्या आत्मजा कासट यांना उपचारासाठी आगाशी रोड येथील रुग्णालयात दाखल करण्यात आले. मात्र, उपचारादरम्यान रात्री उशिरा आत्मजा कासट यांचा मृत्यू झाला आहे.

या अपघात प्रकरणी अर्नाळा सागरी पोलीस ठाण्यात भरदाव कार चालविणाऱ्या चालकाविरोधात गुन्हा दाखल करण्यात आला आहे. शुभम पाटील (वय २४) असे कार चालकाचे नाव असून त्याला अर्नाळा पोलिसांनी अटक केली आहे. याप्रकरणी अधिक तपास पोलीस करीत आहेत.