Tej Police Times
राज ठाकरे महाराष्ट्र पिंजून काढणार, विधानसभेला ‘नवनिर्माणाची लाट’, वेळापत्रक जाहीर
म.टा.खास प्रतिनिधी, मुंबई : आगामी लोकसभा निवडणुकीच्या पार्श्वभूमीवर महाराष्ट्र नवनिर्माण सेनेचे अध्यक्ष राज ठाकरे यांनी शुक्रवारी त्यांच्या नवनिर्माण यात्रेची घोषणा केली. या घोषणेनुसार येत्या ४ ऑगस्टपासून राज ठाकरे महाराष्ट्राच्या दौऱ्यावर रवाना होणार असून या दौऱ्याची सुरुवात सोलापूर येथे होणार असून दौऱ्याची सांगता छत्रपती संभाजी नगर येथे होणार आहे. या दौऱ्यात ते संबंधित जिल्हातील निरीक्षक आणि पदाधिकाऱ्यांच्या बैठका घेणार असल्याचे जाहीर करण्यात आले आहे.
महाराष्ट्र नवनिर्माण सेनेच्या नुकत्याच पार पडलेल्या पदाधिकारी मेळाव्यात अध्यक्ष राज ठाकरे यांनी महाराष्ट्र दौरा करणार असल्याची घोषणा केली होती. त्यानंतर सर्वांचे लक्ष या दौऱ्याकडे लागून राहिले असतानाच या दौऱ्याची अधिकृत घोषणा शुक्रवारी पक्षाकडून करण्यात आली. ४ ऑगस्टपासून सुरु होणाऱ्या या दौऱ्याची सुरुवात सोलापूर येथून होणार आहे. सोलापूर येथे कार्यकर्त्यांशी संवाद साधल्यानंतर राज ठाकरे हे लातूर येथील कार्यकर्त्यांची बैठक घेणार आहेत.
या दौऱ्यात ७ ऑगस्ट रोजी मनसे अध्यक्ष राज ठाकरे हे नांदेड येथे पोहोचणार असून तेथील निरीक्षक आणि पदाधिकाऱ्यांची बैठक घेणार आहेत. त्यानंतर ८ ऑगस्ट रोजी हिंगोली, ९ ऑगस्ट रोजी परभणी, १० ऑगस्ट रोजी बीड, ११ ऑगस्ट रोजी जालना आणि १२ ऑगस्ट रोजी छत्रपती संभाजी नगर येथे दाखल होणार आहेत. संभाजी नगर येथे कार्यकर्ते आणि पदाधिकाऱ्यांची १३ ऑगस्टला संवाद साधणार आहेत. त्यानंतर या दौऱ्याची सांगता होईल, असे त्यांनी जाहीर केले.
Uddhav Thackeray: ठाकरेंना लोकसभेचं भाषण विधानसभेत पडणार भारी? निवडणूक आयोग घेणार अंतिम निर्णय, काय प्रकरण?
मनसेकडून उमेदवारांचा शोध सुरू
आगामी विधानसभा निवडणूक स्वबळावर लढविण्याची घोषणा करणाऱ्या महाराष्ट्र नवनिर्माण सेनेने उमेदवारांचा शोध सुरू केला आहे. राज ठाकरे यांनी विधानसभा निवडणूक स्वबळावर लढण्याचे जाहीर करताच मनसैनिक उत्साहात आले. मतदारसंघाचा अंदाज घेऊन इच्छुकांनी तयारी सुरू केली.
मात्र, आवश्यक बळाअभावी संभ्रमावस्थादेखील आहे. इतर पक्षांकडून प्रक्रिया सुरू झाल्यानंतर मनसे नेतेसुद्धा कामाला लागले आहेत. विधानसभेसाठी महायुती विरुद्ध महाआघाडी अशी थेट लढत होणार असली तरी, बहुजन समाज पक्ष आणि आम आदमी पार्टीपाठोपाठ आता मनसेसुद्धा मैदानात उतरत आहे. त्यामुळे अनेक मतदारसंघात बहुरंगी लढतीचे चित्र राहील.