Tej Police Times, The first and leading Marathi news web portal of Maharashtra, provides the hard core news to Maharashtrians in their own language. It also has a varied programming mix having Politics, Sports, Entertainment news coverage
कडक सॅल्यूट! वायनाडच्या मदतीला नगरच्या कन्येचे हात; मेजर सीता शेळके यांच्या पथकाने उभारला ३१ तासांत पूल
म. टा. प्रतिनिधी, नगर : केरळमधील वायनाड येथे दरड कोसळून झालेल्या दुर्घटनेतील मदत आणि पुनर्वसन कार्यात नगर जिल्ह्यातील मेजर सीता शेळके यांचेही योगदान मिळते आहे. त्यांच्या नेतृत्वाखालील पथकाने ३१ तासांत १९० फुटांचा पूल तयार केला आहे. आता तो महाराष्ट्रासोबतच नगरच्याही कौतुकाचा विषय झाला आहे.
पारनेर तालुक्यातील भोंद्रे (टाकळी ढोकेश्वर) या मूळ गावातील सीता शेळके यांनी लष्करात अधिकारी होण्याची जिद्द बाळगली होती. अभियांत्रिकीचे शिक्षण घेऊन त्या अधिकारी झाल्या. सध्या त्या वायनाड जिल्ह्यातील मदत आणि पुनर्वसन कार्यात सहभागी झाल्या आहेत.
पारनेरच्या शेळके कुटुंबातील बहुतांश सदस्य उच्चशिक्षित, उच्चपदस्थ सरकारी अधिकारी आहेत. सीता यांचे वडील अशोक शेळके वकील असून, ते येथील स्वामी समर्थ बँकेचे अध्यक्ष आहेत. मेजर सीता शेळके अभियांत्रिकी काम करणाऱ्या तुकडीच्या प्रमुख आहेत. केरळमधील कामासाठी त्यांच्या पथकाला पाचारण करण्यात आले. बंगळुरूमधील लष्कराच्या मद्रास इंजिनिअरिंग ग्रुप या ७० जणांच्या पथकात त्या एकमेव महिला अधिकारी आहेत. भूस्खलनामुळे वाहत्या नदीवर पूल उभारणे आव्हानात्मक काम होते. मेजर शेळके यांच्यासह त्यांच्या पथकाने अथक परिश्रम घेऊन हे काम पूर्ण केले. ‘मद्रास सॅपर्स’ लष्करासाठी पूल बांधण्याचे काम करते.
कुटुंब बचावले
भूस्खलन दुर्घटनेनंतर वायनाडमध्ये शहरांच्या खुणा नष्ट झाल्या असताना आणि बेपत्तांचा शोध सुरू असतानाच मुंडक्कई क्षेत्राकडे सर्वांचे लक्ष वेधले गेले. घटनेच्या तीन दिवसांनंतर बचावकार्यातील कर्मचाऱ्यांनी अडकलेल्या एका कुटुंबातील चौघांना शुक्रवारी सुरक्षित बाहेर काढले. यासाठी हेलिकॉप्टरची मदत घेण्यात आली. त्यामुळे सर्वत्र हाहाः कार असताना हे कुटुंब बचावल्याची सकारात्मक बाब पुढे आली आहे.
बचाव कार्यात काम करणाऱ्या पथकाचा एक भाग आहे याचा अभिमान वाटतो. आमच्या पथकातील सर्व जवानांच्या सहाकार्याने आम्ही हा पूल उभारू शकलो.-मेजर सीता अशोक शेळके
आमची कन्या लष्करात अधिकारी याचा अभिमान आहेच. वायनाडमधील आपत्तीग्रस्तांची लवकरात लवकर सुटका व्हावी, यासाठी सीताच्या लष्करी शिक्षणाचा उपयोग झाला याचा अभिमान आहे.– नंदा अशोक शेळके, सीता यांच्या आई.