Tej Police Times
अजितदादा भाकरी फिरविणार, सर्व पदाधिकाऱ्यांना राजीनामा देण्याचे आदेश, कारण काय?
दीपक पडकर, बारामती : काही जण उत्साहाच्या भरात काहीही करतात. कार्यकर्त्यांच्या कृतीवर मला मध्यंतरी ट्रोल करण्यात आले. माझी बदनामी केली. उत्साहाच्या भरात काहींनी (बारामती लोकसभा निवडणुकी प्रचारादरम्यान) मडकी फोडली. यावरून माझ्यावर आरोप केले गेले की, अजित पवार याचीच वाट बघत आहेत. याच्याशी माझा काहीही संबंध नाही. हे सर्व मी टीव्हीवरच बघितले होते. मी असे करायला कधीच सांगणार नाही. मात्र यापुढे असे काही करू नका, असा सल्ला देत उपमुख्यमंत्री अजित पवार यांनी काम झालं नाही तरी चालेल मात्र वजाबाकी करण्याच्या भानगडीत पडू नका, अशी विनंतीवजा सूचना कार्यकर्त्यांना केली. पुन्हा अशी कामे जर कुणी केली तर मी असे समजेल की तिकडून पाठवलेलं पिल्लू (शरद पवार गट) इकडे परत आले आहे. एवढे सांगूनही परत परत चुका करत असाल तर ते सुपारी घेऊनच आलेत असे मी समजेल, अशा शब्दांत अजित पवार यांनी कार्यकर्ते पदाधिकाऱ्यांचे कान टोचले.
उपमुख्यमंत्री अजित पवार यांच्या उपस्थितीत बारामतीत कार्यकर्ता मेळाव्याचे आयोजन करण्यात आले होते. या मेळाव्यात मार्गदर्शन करताना अजित पवार बोलत होते.
अजित पवारांचा कार्यकर्त्यांना ‘दे धक्का’
बारामती शहर व तालुक्यातील सर्व पदाधिकाऱ्यांना पुढील आठ दिवसात राजीनामे देण्याचे आदेश उपमुख्यमंत्री अजित पवारांनी दिले आहेत. विधानसभा निवडणुकीच्या तोंडावर अजित पवारांनी हे आदेश दिले. त्यामुळे बारामती शहर व तालुक्यात आता भाकरी फिरवली जाणार असून नव्या दमाच्या कार्यकर्त्यांना पक्षात प्रमुखपदी काम करण्याची संधी मिळणार आहे.
Yugendra Pawar: बारामतीत सखा पुतण्या अजित पवारांच्या विरोधात शड्डू ठोकणार; युगेंद्र पवारांमुळे वातावरण ढवळून निघाले
सध्या शहर व तालुक्यात कार्यरत असणाऱ्या सर्व पदाधिकाऱ्यांना राजीनामे देण्याचे आदेश दिले असून १५ ऑगस्टपूर्वी नव्या पदाधिकाऱ्यांची पुनर्नियुक्ती करण्यात येणार असल्याचे संकेतही पवार यांनी दिले. लोकसभा निवडणूक झाल्यानंतर उपमुख्यमंत्री अजित पवार तीन दिवस बारामती दौऱ्यावर होते. या दौऱ्या दरम्यान अनेकांनी पदाधिकाऱ्यांविषयी पक्षातील कामावरून अजितदादांकडे नाराजी व्यक्त केली होती. या नाराजीचा गांभीर्याने विचार करून त्यांनी पदाधिकाऱ्यांबाबत तात्काळ निर्णय घेतल्याचे आज दिसून आले.
आपलाच स्टेज अन् आपलाच कार्यक्रम..?
आपल्याच स्टेजवर बसायचे आणि आपलाच कार्यक्रम करायचा.? आता असले चालणार नाही. तीन दिवसांच्या बारामती दौऱ्यावर असताना अनेकांनी पदाधिकाऱ्यांविषयी नाराजी व्यक्त केली की, दादा तुमचा समजणारा कार्यकर्ता प्रत्यक्षात तुमचा नाही. तुम्ही त्याला एवढे काही दिले तरी तो चुकीचे काम करतोय, असे अनेकांनी मला सांगितले. हे आता चालणार नाही, अशी नाराजी अजित पवार यांनी बोलून दाखवली.