सिन्नर विधानसभा मतदारसंघाचं समीकरण कसं असेल? अजित पवार विरुद्ध शरद पवार सामना होणार?

अजित भाबड, नाशिक/मुंबई : सिन्नर विधानसभा मतदारसंघ एक असा मतदारसंघ जिथे कुठल्याही पक्षाकडे नव्हे तर व्यक्तीकडे पाहून त्याला निवडून दिलं जातं. या मतदारसंघात आतापर्यंत कोकाटे आणि वाजे या दोन घराण्यांमध्येच राजकीय लढत पाहायला मिळाली. परंतु आता या दोघांमध्ये तिसऱ्या नेतृत्वाने एन्ट्री घेण्याचं ठरवलं आहे. त्यांचं नाव आहे उदय सांगळे. उदय सांगळेंनी सिन्नर विधानसभा मतदासंघातून निवडणूक लढवण्याची घोषणा केली आहे. जाणून घ्या सिन्नर विधानसभा मतदारसंघाचं समीकरण कसं असेल? आमदार माणिकराव कोकाटे यांना धक्का बसणार बसणार का?

आमदार माणिकराव कोकाटे यांची सिन्नर तालक्यात कार्यसम्राट आमदार म्हणून ओळख आहे. उच्च दर्जाची विकास कामं आमदार माणिकराव कोकाटेंनी सिन्नर शहरात केली आहेत.

आमदार माणिकराव कोकाटेंची राजकीय ताकद किती आहे?

सिन्नरच्या राजकारणात माणिकराव कोकाटे यांचा मोठा दबदबा आहे. कोकाटे यांनी शिवसेना, काँग्रेस, भाजप, राष्ट्रवादी काँग्रेस अशा चार पक्षांचा प्रवास पूर्ण केला. कोकटेंची आतापर्यंत चार वेळा सिन्नर तालुक्यातून आमदार म्हणून निवड झाली आहे. मुलगी सीमंतिनी कोकाटे नाशिकच्या माजी जिल्हा परिषद सदस्य आहेत. सीमंतिनी कोकाटे यांचा सुध्दा मतदारसंघात दांडगा जनसंपर्क आहे.

सिन्नर शहरात अनेक विकासकामं

माणिकराव कोकाटे यांनी सिन्नरमध्ये अत्याधुनिक बस स्थानक, प्रशासकीय कार्यालयांच्या प्रशस्त इमारती यासह विविध विकासकामं केली आहेत. परंतु कोकाटे हे ग्रामीण भागाकडे जास्तीचं लक्ष देत नाही अशी तक्रार मतदारांकडून सातत्याने येत असते. नुकत्याच झालेल्या लोकसभा निवडणुकीत कोकटेंचे प्रतिस्पर्धी राजाभाऊ वाजे यांना नाशिक लोकसभा मतदारसंघासाठी महाविकास आघाडीकडून तिकीट देण्यात आलं. या निवडणुकीत राजाभाऊ वाजेंनी हेमंत गोडसेंचा पराभव केला आणि ते नाशिकचे खासदार झाले. वाजे दिल्लीत गेल्यामुळे माणिकराव कोकाटेंचा आमदारकीचा मार्ग मोकळा झाला होता. आता याच कोकटेंना टक्कर देण्यासाठी उदय सांगळे मैदानात उतरणार आहेत.

उदय सांगळे यांची राजकीय ताकद किती?

उदय सांगळे २० वर्षांपासून सिन्नरच्या राजकारणात सक्रिय आहेत. २००९ मध्ये उदय सांगळेंनी शिवसेनेत प्रवेश केला. त्यानंतर २०११ मध्ये राष्ट्रवादी कॉंग्रेस पक्षात प्रवेश करून पंचायत समितीची निवडणूक लढवली. पत्नी शितल सांगळे नाशिक जिल्हा परिषदच्या माजी अध्यक्ष आहेत. मंत्री दादा भुसेंचे निकटवर्तीय म्हणून उदय सांगळेंची ओळख आहे. सिन्नर शहरासह ग्रामीण भागातही त्यांचा दांडगा जनसंपर्क आहे.

राजाभाऊ वाजेंना लोकसभा निवडणुकीत मताधिक्य

२०१४ च्या विधानसभा निवडणुकीत राजाभाऊ वाजे हे उदय सांगळेंच्या साथीने निवडून आले होते. त्याचं कारण म्हणजे तेथील ‘वंजारी’ समाज. सिन्नर तालुक्यात मराठा समजाबरोबरच वंजारी समाज मोठ्या प्रमाणात आहे. राजाभाऊ वाजे हे मराठा समाजाचे नेते आहेत. तरी सुध्दा २०१४ च्या निवडणुकीत त्यांना वंजारी समाजाचं मताधिक्य मिळालं. एकूणच उदय सांगळे सोबत असल्याचा फायदा वाजेंना झाला होता. उदय सांगळेंनी महाविकास आघाडीकडून निवडणूक लढवण्याची तयारी सुरु केली आहे. परंतु उदय सांगळेंनी अद्याप कोणत्याही पक्षात प्रवेश केलेला नसून लवकरच ते आपली भूमिका जाहीर करणार आहेत.

शरद पवारांनी राज्यातील २१ मतदारसंघात नव्या चेहऱ्यांना संधी देण्याचा निर्णय घेतला आहे. यामध्ये सिन्नर विधानसभा मतदारसंघाचा देखील समावेश आहे. त्यामुळे उदय सांगळेंनी शरद पवार गटात प्रवेश केला, तर त्यांना तिकीट दिलं जाण्याची शक्यता आहे. तर माणिकराव कोकाटे हे अजित पवार गटाचे आमदार आहेत. असं झाल्यास सिन्नरमध्ये अजित पवार विरुद्ध शरद पवार असा थेट सामना पाहायला मिळेल.