Tej Police Times
लव्ह ट्रँगलमधून तरुणाचा घात, लोणार सरोवर परिसरात मृतदेह; हत्याकांडाचा असा झाला उलगडा
अमोल सराफ, बुलढाणा : लोणार सरोवर परिसरात प्रेमाच्या त्रिकोणातून तरुणाचा घात झाल्याची धक्कादायक घटना उघडकीस आली आहे. परिसरात उघडकीस आलेल्या तरुणाच्या हत्याकांडाचा अखेर उलगडा झाला आहे. प्रेमाच्या त्रिकोणातून ही हत्या झाल्याचं समोर आलं आहे. दुसऱ्या प्रियकराच्या मदतीने प्रेयसीने पहिल्या प्रियकराचं हत्याकांड घडवल्याची खळबळजनक माहिती पोलीस तपासात निष्पन्न झाली आहे.
नेमकं प्रकरण काय?
प्रेयसीने लोणार सरोवरात फिरण्याच्या बहाण्याने तिच्या आधीच्या प्रियकराला आणळं. लोणार सरोवराजवळ आणल्यानंतर नियोजित कटानुसार दबा धरुन बसलेल्या प्रेयसीच्या दुसऱ्या प्रियकराने मागून गळा आवळत तरुणाची हत्या केली. मृत तरुण आणि आरोपी हे दोघंही परभणी जिल्ह्याचे रहिवाशी आहेत. मृत तरुण बेपत्ता असल्याने त्याचा शोध सुरू होता. त्याचा शोध सुरू असताना गावातील विवाहित महिलेशी त्याचे अनैतिक संबंध असल्याची माहिती समोर आली होती. या माहितीनंतर या हत्येचा गुन्हा उघडकीस आला.
Vinesh Phogat Hospitalised : फायनलसाठी अपात्र ठरल्यानंतर विनेश फोगाटची तब्येत बिघडली, रुग्णालयात दाखल
मुलगा बेपत्ता झाल्याची वडिलांची तक्रार
पोलिसांनी आरोपी प्रियकर आणि प्रेयसीला अटक केली आहे. अर्जुन दिलीप रोडगे, वय वर्ष २८ असं मृत तरुणाचं नाव आहे. तो परभणी जिल्ह्यातील सेलू तालुक्यातील खळगावचा रहिवासी होता. अर्चना विठ्ठल सरोदे, वय वर्ष २९ रा. रवळगाव, ता. सेलू असं आरोपी प्रेयसीचं नाव आहे. तर ज्ञानेश्वर उर्फ माऊली आहेलाजी डुकरे, वय वर्ष २४ रा. खडुळा ता. पाथरी जि. परभणी असं दुसऱ्या आरोपीचं नाव आहे. या प्रकरणात आणखी एका आरोपीचा सहभाग असून, त्याचाही शोध घेतला जात असल्याची माहिती पोलीस सूत्रांनी दिली आहे.
मृत अर्जुन रोडगे याचा मृतदेह लोणार सरोवरतील यज्ञेश्वर मंदिराजवळील दर्गा रोडच्या बाजूला असलेल्या एका घनदाट जंगलातील जाळीत आरोपींनी फेकून दिला होता. अर्जुन दिलीप रोडगे हा २ ऑगस्टपासून बेपत्ता झाला होता. याबाबत त्याचे वडील दिलीप बाबाराव रोडगे यांनी सेलू पोलीस ठाण्यात ३ ऑगस्टला तक्रार दाखल केली होती. त्यानुसार तपास करताना पोलिसांना अज्ञात तरुणाचा मृतदेह आढळला. त्यानंतर पोलिसांच्या पुढील तपासावेळी हा मृतदेह अर्जुनचा असल्याचं समोर आलं.