नातवाने आधी आजोबांना संपवलं, नंतर आजीचाही मृतदेह धरणात; असा झाला घटनेचा उलगडा

वाशिम : वाशिमच्या मानोरा येथे वृद्ध आजोबा – आजीची नातवाने हत्या केल्याची घटना घडली आहे. तीन मित्रांच्या साहाय्याने हत्या करून मृतदेह अडान नदीत फेकून दिल्याची घटना समोर आली. या हत्येप्रकरणी नातवासह त्याच्या तीन मित्रांना पोलिसांनी अटक केली आहे. मानोरा तालुक्याच्या इंझोरी परिसरातील अडाण धरणामध्ये प्रल्हाद वीर या वृद्धाचा मृतदेह ६ ऑगस्ट रोजी आढळून आला होता. तर ८ ऑगस्ट रोजी आजीचाही मृतदेह शोधून काढण्यात पोलिसांना यश आलं आहे.

असा झाला हत्येचा उलगडा

आजोबांचा मृतदेह आढळून आल्यानंतर पोलिसांनी त्यांची ओळख पटवत त्यांच्या घरी जाऊन पाहणी केली. त्यावेळी घरात रक्ताचे डाग आढळून आले होते. तसंच त्यांची पत्नी निर्मला वीर देखील बेपत्ता असल्याचं समोर आलं होतं. पोलिसांनी या घटनेचा तपास करत असताना शेजारील घराचे सीसीटीव्ही फुटेज तपासलं. त्यानंतर नातवासह त्याला मदत करणाऱ्या तिघांना अटक करण्यात आली आहे. नदीतील मृतदेह वर आल्यानंतर या घटनेची माहिती मिळाली.
Pune News : कुरिअर सर्विसमधून फोन, आधार कार्ड वापरल्याची माहिती, नंतर पोलिसांच्या मदतीचा बनाव; पुण्यात महिलेसोबत काय घडलं?
मानोराच्या मंगरुळपिर रोड वरील एका घरात प्रल्हाद वीर आणि निर्मला वीर हे वृद्ध दाम्पत्य राहत होतं. रविवार ४ ऑगस्ट रोजी रात्री आजोबा आणि नातू प्रतीक वीर यांच्यामध्ये संपत्ती वरून वाद झाल्याची माहिती समोर आली आहे. त्या वादानंतर या वादात नातू प्रतीक वीर याने धारधार शस्त्राने आजोबांच्या शरीरावर वार करुन त्यांची हत्या केली. याच वेळी प्रतीक वीरची आजी निर्मला वीर या दोघांमध्ये आल्या असता त्यांच्याही गळा दाबून हत्या केली. आरोपींनी दोघांचे मृतदेह कारमध्ये टाकून अडाण धरणात फेकून दिल्याची माहिती पोलिसांनी दिली.
Man Drowned In Waterfall : धबधब्यावर पाण्यात पडला, काही वेळ साळखीचा आधार, पण हात निसटला आणि… १५० फूट खोल दरीत तरुणाचा अंत

वेगवेगळ्या गावात फिरत होता आरोपी

मृतदेह नेलेली कार प्रतीकने जालना जिल्ह्यातील भोकरधन इथे त्याच्या मित्राकडे नेऊन ठेवली होती. त्यानंतर प्रतीक वीर हा मागील ४ दिवसांपासून वेगवेगळ्या गावांत फिरत होता. त्याला पोलिसांनी वाशिम जिल्ह्यातील सायखेडा येथून ताब्यात घेतलं आहे. आजोबा प्रल्हाद वीर यांचा मृतदेह बुधवारी अडाण धरणात तरंगतांना दिसल्याने या खून प्रकरणाचा उलगडा करण्यात पोलिसांना यश मिळालं. या खून प्रकरणात मृत प्रल्हाद वीर यांचा आरोपी नातू प्रतीक वीर त्याला मदत करणारे विकास भगत, जगदीश देवकर आणि जीवन फडके अशा चौघांना अटक करण्यात आली आहे.

संपत्तीच्या वादातून ही दुहेरी खूनाची घटना घडल्याची माहिती जिल्हा पोलिस अधीक्षक अनुज तारे यांनी दिली आहे. या दुहेरी खून प्रकरणाचा पुढील तपास स्थानिक गुन्हे शाखेचे पोलीस निरीक्षक रामकृष्ण महल्ले, मानोरा ठाणेदार प्रवीण शिंदे, पोलीस उपनिरीक्षक रामेश्वर नागरे यांच्यासह पोलीस करत आहेत.