दादर सुटकेस हत्याप्रकरणात नवी माहिती, अर्शदचं फॅन फॉलेईंग वाढल्याने कट, परदेशातून सुपारी अन्…

मुंबई: दादर येथे एका ३० वर्षीय मूकबधीर तरुणाचा मृतदेह एका सुटकेसमध्ये आढळून आल्याने एकच खळबळ उडाली होती. दादर रेल्वे स्थानकात एका सुटकेसमध्ये अर्शद अली सादिक शेख या मूकबधीर व्यक्तीचा मृतदेह एका सूटकेसमध्ये आढळून आला होता. अर्शदच्या हत्ये प्रकरणात आता दररोज नवनवीन माहिती समोर येत आहे. अर्शदच्या मित्रांनीच त्याची हत्या केल्याचं समोर आलं होतं. तर या प्रकरणात एका महिलेचाही सहभाग असल्याचा संशय पोलिसांना होता. आतापर्यंत पोलिसांनी या प्रकरणात २९ वर्षीय जय चावडा आणि शिवजित सिंग यांना अटक केली. हे दोघेही मूकबधीर आहेत. आता या प्रकरणात नवी माहिती समोर आली आहे.

या प्रकरणात परदेशातील एका व्यक्तीचा संबंध असल्याचे अनेक पुरावे पोलिसांच्या हाती लागले आहेत. त्यानुसार, मूकबधीर कम्युनिटीमध्ये अर्शद शेखची फॅन फॉलोईंग वाढत असल्याने त्याच्या हत्येची सुपारी देण्यात आल्याचा संशय आहे.
Body in Suitcase : काम झालं का? अर्शदच्या हत्येनंतर जयला फोन, ‘ती’ महिला रडारवर, बेल्जियमचा व्हिडिओ कॉलही तपासणार
जय चावडा आणि शिवजित सिंग यांनी अर्शदची हत्या केली. आधी शिवजितने अर्शदचे कपडे काढून त्याला मारहाण केली त्यानंतर त्याच्या डोक्यात हातोडीने वार करत त्याचा जीव घेतला. त्यावेळी शिवजित सिंगने कोणालातरी व्हिडिओ कॉल केला होता, या व्यक्तीची ओळख जगपाल सिंग असल्याची माहिती आहे. जगपाल हा दुबई किंवा बेल्जियममध्ये राहत असल्याची माहिती आहे. जेव्हा जगपालला व्हिडिओ कॉल केला तेव्हा त्याने आणखी दोन महिलांना हे सारं दाखवलं. जगपालनेच अर्शदला मारण्यासाठी शिवजित आणि जयला सुपारी दिली, असा संशय पोलिसांना आहे. सध्या पोलीस या प्रकरणाचा तपास करत आहेत.

जगपाल आणि जय हे मित्र आहेत. जय हा सधन कुटुंबातील आहे. त्याचे नातेवाईक परदेशात राहत असल्याची माहिती आहे. तर मूकबधीर कम्युनिटीमध्ये जगपाल सिंग प्रसिद्ध होता. पण, गेल्या काही काळापासून अर्शदची फॅन फॉलोईंग वाढत चालली होती. हे काही जगपालला पसंत पडले नसावे आणि याच कारणामुळे त्याने अर्शदचा काटा काढण्यासाठी सुपारी दिली असावी अशी शक्यता आहे. सध्या पोलिसांनी जगपाल सिंगविरोधात गुन्हा दाखल केला असून तपास सुरु आहे.