Tej Police Times
महेश पाटील, नंदुरबार : पती-पत्नी त्यांच्या दोन वर्षाचा बालकाला घेऊन गावाकडे परतत असताना पण रस्त्यावर भरधाव वेगात जाणाऱ्या आयशरने पतीच्या डोळ्यादेखत पत्नीसह बालकाला चिरडल्याची दुर्दैवी घटना घडली. ही घटना अक्कलकुवा तालुक्यातील अतिदुर्गम भागातील मोलगी ते वडफळीदरम्यान बिजरीगव्हाण गावाच्या वळण रस्त्यावर ११ ऑगस्ट रोजी दुपारी साडेबाराच्या सुमारास घडली. एकाच कुटुंबातील दोघांचा बळी गेल्याने गावात शोककळा पसरली.अक्कलकुवा तालुक्यातील चिवलउतार ह.मु. पांढरामाती येथील रहिवासी सुभाष मोत्या वसावे हे पत्नी सोमीबाई सुभाष वसावे व मुलगा सुशील सुभाष वसावे यांच्यासह मोलगी येथून मोटारसायकलने त्यांच्या गावी पांढरामाती येथे साडेबाराच्या सुमारास जात होते. यावेळी बिजरीगव्हाण गावाजवळ वळण रस्त्यावर आयशर (एमएच.१२.डब्ल्यूजे.७४०३) भरधाव वेगाने येऊन सुभाष वसावे यांच्या दुचाकीला धडक दिली. दुचाकी खाली पडल्यानंतर या इशारा सोमीबाई वसावे (वय २८) व सुशील वसावे (वय २ वर्ष) यांना चिरडल्याने त्यांचा मृत्यू झाला. तर सुभाष वसावे जखमी झाले. या प्रकरणी मोलगी पोलीस ठाण्यात सुभाष वसावे यांच्या फिर्यादीवरून आयशर चालक मिलन अंबादास गवई रा.खंडाळा, जि.अकोला यांच्यावर भा.न्या.सं.कलम १०६(१),२८१,१२५(अ), १२५(ब), ३२४(४), मो.वा.का.कलम १८४ प्रमाणे गुन्हा दाखल करण्यात आला आहे. पुढील तपास पोलीस उपनिरीक्षक सागर गाडीलोहार करीत आहे.
डोळ्यादेखत पत्नी, मुलगा गमावला
डोळ्यादेखत पत्नी, मुलगा गमावला
भरधाव वेगाने जाणाऱ्या आयशरने पतीच्या डोळ्यादेखत पत्नीसह मुलाला चिरडल्याची हद्यद्रावक घटना घडली. यावेळी गंभीर जखमी झालेल्या दुचाकीस्वाराचा आक्रोशाने अनेकांचे हृदय पिळवटले गेले. एकाच कुटुंबातील दोघांचा बळी गेल्याने मोलगी परिसरात शोककळा पसरली आहे.
रेल्वे स्थानकावर जाणाऱ्या दिव्यांगाला कारने उडवलं
दरम्यान, काही दिवसांपूर्वी रेल्वे स्थानकावर जाणाऱ्या एका दिव्यांगाला अज्ञात चारचाकी वाहनाने जोरात धडक देऊन पसार झाल्याची घटना गुरुवारी रोजी रात्री साडेबारा वाजेदरम्यान घडली. या अपघातात दिव्यांग व्यक्तीचा मृत्यू झाला असून अज्ञात वाहन चालकाविरुद्ध नंदुरबार शहर पोलीस ठाण्यात गुन्हा दाखल करण्यात आला आहे.
पोलिस सुत्रांनी दिलेल्या माहितीनुसार, रेल्वे स्टेशनकडे जाणाऱ्या रस्त्यावर ८ ऑगस्ट रोजी रात्री साडेबारा वाजेच्या सुमारास एका अनोळखी दिव्यांग व्यक्तीला एका ग्रे रंगाच्या चारचाकी वाहनावरील चालकाने उडवलं. त्याच्या ताब्यातील वाहन हे रस्त्याच्या परिस्थितीकडे दुर्लक्ष करून निष्काळजीपणे भरधाव वेगात चालवून अपंग व्यक्तीला जोराची धडक दिली. यात तो गंभीररित्या जखमी झाल्याने त्याचा मृत्यू झाला. दरम्यान, अपघात झाल्यानंतर अज्ञात वाहनचालक घटनास्थळावरून पसार झाला. या प्रकरणी विशाल कोमलसिंग राजपूत (रा.मोठा मारूतीमागे कुंभारवाडा, नंदुरबार) यांच्या फिर्यादीवरून नंदुरबार शहर पोलिस ठाण्यात अज्ञात चारचाकी चालकाविरुद्ध गुन्हा दाखल करण्यात आला आहे.