Tej Police Times
आधी लेकाशी भेट, आता आमदार पित्याला घेरण्याची तयारी; काँग्रेसमधून आयात नेत्याला पवारांचं बळ
प्रसाद रानडे, रत्नागिरी : कोकणात चिपळूण विधानसभा मतदारसंघात लक्ष घालत अखेर शरद पवार यांनी डाव टाकला आहे. उपमुख्यमंत्री अजित पवार यांच्या नेतृत्वातील राष्ट्रवादी काँग्रेसचे आमदार शेखर निकम यांना घेरण्यासाठी शरद पवार यांनी मोठी रणनीती आखली आहे. चिपळूण विधानसभा मतदारसंघात विधानसभेचे इच्छुक उमेदवार प्रशांत यादव यांना मोठं बळ देत शरद पवारांनी पक्षाच्या प्रदेश सरचिटणीसपदी त्यांची निवड केली आहे. चिपळूण विधानसभेसाठी आता दस्तुरखुद्द शरद पवार यांनीच तयारीला लागण्याचे आदेश दिले आहेत. नुकतीच अनिरुद्ध शेखर निकम यांच्याशी शरद पवारांची अराजकीय भेट झाली होती, त्यानंतर आता पित्याला घेरण्याची तयारी शरद पवारांनी केली आहे.
शरद पवार यांनी चिपळूण विधानसभा मतदारसंघातून तुतारीची तयारी केल्याने शिवसेनेकडून इच्छुक असलेल्या भास्कर जाधव यांना गुहागरमधूनच लढावे लागण्याची शक्यता अधिक आहे. त्यामुळे आगामी विधानसभा निवडणुकीत महायुतीकडून अजित दादांच्या राष्ट्रवादीचे विद्यमान आमदार शेखर निकम, आणि महाविकास आघाडीचे प्रशांत यादव यांच्यात हा मुख्य सामना होणार असल्याचे आता जवळपास स्पष्ट आहे. यासाठी २९ ऑगस्ट रोजी प्रशांत यादव यांच्या प्रचाराचा नारळ खुद्द शरद पवार यांच्या उपस्थिती चिपळूण येथे फुटणार आहे.
जोमाने कामाला लागा, शरद पवार यांच्या सूचना
या कार्यक्रमानंतर शरद पवार यांनी प्रशांत यादव यांच्यासह रत्नागिरी जिल्ह्यातून उपस्थित राहिलेल्या सर्व पदाधिकाऱ्यांशी स्वतंत्र चर्चा केली. यावेळी शरद पवारांनी चिपळूण-संगमेश्वर विधानसभा मतदार संघातील परिस्थितीचा आढावा घेतला आणि सर्वांनी जोमाने कामाला लागा, अशी सूचना केली. तसेच यावेळी त्यांनी वाशिष्ठी डेअरीच्या प्रगतीबाबतही यादव यांच्याकडे मोठ्या आपुलकीने विचारपूस केली.
प्रशांत यादव यांनीही चिपळूण संगमेश्वर विधानसभा मतदारसंघांमध्ये निवडणुकीच्या दृष्टीने गेल्या काही महिन्यापासून आपले संपर्क दौरे सुरू केले आहेत. प्रशांत यादव यांचा संपर्क मोठा आहे. संयमी नेतृत्व म्हणून त्यांच्याकडे पाहिले जाते. प्रशांत यादव यांचेही सर्वपक्षीय संबंध चांगले आहेत. त्यामुळे या सगळ्याचा फायदा इथे विधानसभा निवडणुकीत होण्याची शक्यता अधिक आहे.
प्रशांत यादव यांच्यासमोर शेखर निकम हे अभ्यासू व अनुभवी आमदार असलेले एक कोकणातलं मोठे नेतृत्व आहे. शेखर निकम यांचेही सर्वपक्षीय संबंध उत्तम आहेत. त्यामुळे येत्या विधानसभा निवडणुकीत या दोघांमध्येच लढत झाल्यास ती नक्कीच रंगतदार ठरणार आहे.
याच जागेवरून उद्धव ठाकरे गटाचे नेते आणि गुहागरचे विद्यमान आमदार भास्कर जाधव यांनीही दावा सांगितला आहे. मात्र शरद पवारांनी चिपळूण विधानसभेसाठी एकंदरीत आघाडी घेतल्याचे चित्र आहे. त्यामुळे ही जागा महाविकास आघाडीकडून विधानसभेच्या जागावाटपात शरद पवारांच्या तुतारीलाच सोडण्यात आल्याचे स्पष्ट संकेत मिळत आहेत. भास्कर जाधव आणि शरद पवार यांचे संबंध उत्तम आहेत. त्यामुळे चिपळूण विधानसभा मतदारसंघाचे राजकीय गणित सोडवण्यासाठी आता पवारांनीच लक्ष घातलं आहे.
Pradeep Patil : लोकसभेआधी शिंदेंच्या शिवसेनेत प्रवेश, चार महिन्यांनी पाटलांचे काँग्रेसमधून निलंबन, कारवाईवर संशय
उद्योगपती प्रशांत यादव यांनी चिपळूण तालुका काँग्रेसच्या तालुकाध्यक्ष पदाचा राजीनामा दिल्यानंतर प्रशांत यादव यांनी आपल्या समर्थकांसह २७ जानेवारी २०२४ रोजी राष्ट्रवादी काँग्रेस पक्षात प्रवेश केला होता. शरद पवार यांच्या उपस्थितीतच त्यांचा हा पक्षप्रवेश सोहळा झाला होता. त्याचवेळी पवार यांनी शेखर निकम यांच्या विरोधात मोहरा शोधून प्रशांत यादव यांना उमेदवारीचा शब्द दिला होता. त्यासाठी आता शरद पवार यांच्या राष्ट्रवादीकडून हालचाली सुरू झाल्या असून दस्तुरखुद्द मोठ्या पवारांनी या सगळ्यात लक्ष घातल्याने ही लढत तुल्यबळ ठरण्याची शक्यता आहे.
शुक्रवारी सायंकाळी मुंबईतील राष्ट्रवादी भवनमध्ये आयोजित कार्यक्रमात शरद पवार यांच्या हस्ते प्रशांत यादव यांना निवडीचे पत्र देण्यात आले. आगामी विधानसभा निवडणुकीच्या पार्श्वभूमीवर प्रशांत यादव यांची प्रदेश सरचिटणीसपदी झालेली निवड चिपळूण-संगमेश्वर विधानसभा मतदारसंघाच्या दृष्टीनेही महत्त्वाची मानली जात आहे.