नवी मुंबईकरांचा प्रवास होणार सुपरफास्ट! खारघर किनारी मार्गाला गती, नेरुळ ते खारघर एकाच मार्गाने जोडणार

मनीषा ठाकूर-जगताप, नवी मुंबई : सिडकोच्या बहुप्रतीक्षित खारघर किनारी मार्गाला अखेर ‘सीआरझेड’ची मंजुरी मिळाली आहे. त्यामुळे किनारी मार्गातील अडथळा दूर झाला आहे. या मार्गामुळे सायन-पनवेल मार्गाला नेरुळ ते खारघरदरम्यान एक दुसरा पर्यायी मार्ग उपलब्ध होणार आहे. यामुळे पामबीच मार्गाबरोबर सायन-पनवेल महामार्गावरील वाहतूक कोंडी सुटणार आहे. त्यामुळे नवी मुंबई आंतरराष्ट्रीय विमानतळाकडे आणि अटल सेतूकडे जाण्यासाठीच्या नवीन मार्गाचा पर्याय उपलब्ध होणार आहे. परिणामी, शहरातील वाहतूक सुकर होणार आहे.

सिडकोच्या वतीने नेरुळ जेट्टी ते खारघर हा किनारी मार्ग उभारला जात आहे. मात्र, या मार्गात अनके खारफुटी येत असल्याने, ‘सीआरझेड’च्या कचाट्यात हा मार्ग सापडला होता. परिणामीया कामाला परवानगी मिळत नव्हती.त्यामुळे या किनारी मार्गाच्या उभारणीमध्ये कमीत कमी खारफुटीची हानी होईल, असे तीन पर्याय सादर करण्याच्या सूचना, केंद्रीय वन आणि पर्यावरण मंत्रालयाने केल्या होत्या. त्यानुसार सिडकोच्या वतीने तीन पर्याय सादर करण्यात आले होते. या पर्यायांच्या अनुषंगाने खारघर किनारी मार्गला सीआरझेडची परवानगी देण्यात आली आहे.

हा प्रस्तावित खारघर किनारी मार्ग खारघर सेक्टर १६ येथून सुरू होणार असून, त्याची लांबी ९.६ किमी आहे. हा रस्ता सायन-पनवेल महामार्गाला ओलांडून बेलापूर जेट्टीला जोडला जाणार आहे. तिथून पुढे पाम बीच मार्ग पार करून, नेरुळ जेट्टीपर्यत जाणार आहे. या किनारी मार्गच्या उभारणीसाठी एकूण ३८.४५ हेक्टर जमिनीची गरज आहे. त्यातील १०.२१ हेक्टर जागा सिडकोच्या ताब्यात होती. मात्र, इतर जागेवर खारफुटी असल्याने या मार्गाची उभारणी रखडली होती. अखेर या मार्गाच्या उभारणीसाठी सिडकोने, इम्पॅक्ट असेसमेंट अहवाल तयार करून तो सिडकोकडे सादर केला. त्यात खारफुटीची आणि पर्यावरणाची कमीत कमी हानी होण्याचे मान्य केले आणि इथे बाधित होणाऱ्या खारफुटीच्या बदल्यात इतर ठिकाणी तितक्याच खारफुटीची लागवड करण्याचे आश्वस्त केले आहे.

डिझाइन-बिल्ट आधारावर मार्च-२०१९मध्ये या कामाची निविदा काढण्यात आली होती. त्यानुसार प्रकल्पाचा प्रस्तावित खर्च २०५ कोटी ४० लाख इतका होता. मात्र, आता या खर्चात वाढ होण्याची शक्यता आहे.

सिडकोच्या बहुप्रतीक्षित अशा या खारघर किनारी मार्गाला ‘सीआरझेड’ची परवानगी मिळाली आहे. त्यामुळे या मार्गाच्या उभारणीचा मुख्य अडथळा दूर झाला आहे. – प्रिया रातांबे, जनसंपर्क अधिकारी, सिडको

– खारघर-बेलापूर-नेरुळ किनारी मार्ग हा सायन-पनवेल रोडसाठी नवीन दुवा ठरणार
– खारघर स्थानकाच्या मागे पंतप्रधान आवास योजेनेमध्ये मुख्य प्रवेश मिळणार
– तळोजा येथील कॉर्पोरेट पार्क, पंतप्रधान आवास गृहनिर्माण येथे पर्यायी प्रवेश करता येणार
– नेरुळ, बेलापूर आणि खारघर नोडसाठी सायन-पनवेल महामार्गाला पर्यायी मार्ग मिळणार
– नवीन नियोजित कनेक्टिव्हिटीद्वारे नवी मुंबई आंतरराष्ट्रीय विमानतळ, अटल सेतूशी कनेक्टिव्हिटी
– यासाठी सायन-पनवेल महामार्गावरील फ्लाय ओव्हरसह ६.९६ किमी प्रस्तावित ३० मीटर रुंद किनारी मार्गच्या संपूर्ण संरेखनाचा विचार करण्यात आला