Sanjay Gaikwad : शिंदेंच्या आमदाराने तलवारीने भरवला केक, व्हिडिओ व्हायरल होताच केले खळबळजनक विधान

बुलढाणा, अमोल सराफ : शिंदे गटाचे शिवसेनेचे आमदार संजय गायकवाड अनेक वेळा त्यांच्या कृतीमुळे वादाच्या भोवऱ्यात अडकतात. यावेळेस सुद्धा संजय गायकवाड यांनी आपल्या चिरंजीवाच्या वाढदिवसाच्या दिवशी चक्क तलवारीने केक कापला आणि त्याच तलवारीने त्यांनी आपल्या पत्नीला, मुलाला आणि कार्यकर्त्यांना केक भरवला हीच बाब सोशल मिडीयावर व्हिडिओ स्वरुपात प्रचंड व्हायरल झाली आहे, त्यामुळे पुन्हा एकदा संजय गायकवाड वादात सापडले आहेत.

प्रकरणावर आले संजय गायकवाड यांचे उत्तर

संजय गायकवाड यांनी उत्तर देताना सारवासारव करण्याचा प्रयत्न केला. गायकवाड म्हणाले, आपण काही तलवारीचा वापर कोणाला मारण्याकरिता किंवा हल्ला करण्याकरिता केला नाही. तलवार एक शौर्याचे प्रतीक आहे, आणि जर तलवार वापरणे चुकीचे असं असेल तर ऑलिम्पिंक मधील तलवारबाजी देखील आपल्याला बंद करावी लागेल असे अजब वक्तव्य संजय गायकवाड यांनी केले आहे. नेमका आता याच प्रकरणावर विरोधकांना आयते कोलीत मिळण्याची शक्यता आहे.
मारहाण करून हप्तावसुली, इन्स्टाग्रामवर स्टोरी टाकली, भाईला पोलिसांनी असा बडवला, नंतर रडत रडत माफी!

काय घडले वाढदिवशी?

बुलढाण्याचे शिंदे गटाचे आमदार संजय गायकवाड यांचे सुपुत्र मृत्युंजय गायकवाड यांचा १५ ऑगस्टला बुलढाण्यात धुमधडाक्यात वाढदिवस साजरा करण्यात आला. परवा रात्रीच झालेल्या याच कार्यक्रमात आमदार संजय गायकवाड यांनी स्टेजवर कार्यकर्त्यांचा समक्ष भल्या मोठ्या तलवारीने स्टेजवर केक कापला. तसेच कापलेला केक तलवारीनेच आपल्या पत्नीला आणि मुलाला भरवला. याच संपूर्ण प्रकरणाचा व्हिडिओ सोशल मीडियावर आता जोरदार व्हायरल होत आहे.

सामान्य व्यक्तीने तलवारीने केक कापल्यास त्या व्यक्तीवर आर्म ॲक्ट नुसार गुन्हा दाखल करण्यात येतो. मात्र आता शिंदेंच्या शिलेदाराने भरस्टेजवर तलवारीने केक कापल्याने त्यांचावर सुद्धा कायद्यातील तरतुदीप्रमाणे गुन्हा दाखल करावा अशी मागणी स्थानिक लोकांकडून होत आहे. तलवारीने आपल्या सुविध्य पत्नी पूजा गायकवाड आणि मुलाला केक भरवल्याचा व्हिडिओ समोर आला आहे तरी कारवाई का नाही असा सवाल सुद्धा जिल्ह्यात केला जात आहे. अशातच यावर आता बुलढाणा पोलीस काय कारवाई करतात, हे बघणे महत्त्वाचे ठरणार आहे..