Pooja Khedkar Case: पूजा खेडकरला स्पष्टीकरणाचा लास्ट चान्स; उत्तर न दिल्याने बंगल्यावर अंतिम नोटीस

म. टा. प्रतिनिधी, पुणे: वादग्रस्त प्रशिक्षणार्थी आयएएस पूजा खेडकर हिला केंद्रीय कार्मिक आणि प्रशिक्षण विभागाने (डीओपीटी) दिलेल्या नोटिशीला पुन्हा एकदा कोणतेही उत्तर दिले नसल्याचे समोर आले आहे. या प्रकरणी विभागाने बजावलेल्या नोटिशीनुसार तिला शुक्रवारची मुदत देण्यात आल्यानंतर ही नोटिशीला तिने प्रतिसाद दिला नाही. त्यामुळे यापुढे तिला कोणतेही स्पष्टीकरण देता येणार नसल्याचे विभागाने स्पष्ट केले आहे. दरम्यान, नोटीशीला उत्तर न दिल्याने खेडकर हिच्या घरावर ही नोटीस लावण्यात आली आहे.

केंद्रीय लोकसेवा आयोगाच्या तब्बल १२ वेळा परीक्षा देऊन खेडकर हिने आयोगाची फसवणूक केल्याचे उघडकीस आले. त्यानंतर केंद्रीय कार्मिक व प्रशिक्षण विभागाने तिला नोटीस बजावली होती. या नोटिशीवर तिच्याकडून कोणतेही उत्तर मिळाले नव्हते. विभागाने तिला पुन्हा एकदा नोटीस बजावून तिला १४ ऑगस्टची मुदत दिली होती. त्यानुसार तिला नवी दिल्लीत विभागाचे सहसचिव रजत कुमार यांच्यासमोर शुक्रवारी सकाळी अकरा वाजता म्हणणे मांडण्यासाठी हजर राहण्याचे आदेश दिले होते. तरीही तिच्याकडून उत्तर न मिळाल्याने विभागाने मसुरी येथील लालबहादूर शास्त्री राष्ट्रीय प्रशासन अकादमीमार्फत पुण्यातील ‘यशदा’च्या संचालकांना पत्र पाठवण्यात आले होते. ही नोटीस पूजा खेडकरच्या पुणे आणि भालगाव (ता. पाथर्डी, जि. नगर) येथील घराला लावण्याचा आदेश देण्यात आला होता. त्यानुसार खेडकर हिच्या पुण्यातील पाषाण येथील बंगल्यावर ही नोटीस चिटकविण्यात आली. ही नोटीस प्रत्यक्षात कोणीही स्वीकारली नसल्याने बंगल्याच्या बाहेर नोटीस चिटकविण्यात आल्याचे सूत्रांकडून स्पष्ट करण्यात आले.

या नोटिशीनुसार खेडकर हिला आपले म्हणणे सादर करण्यासाठी १६ ऑगस्टची अंतिम मुदत देण्यात आली होती. यादरम्यान तिने कोणतेही उत्तर न मिळाल्यास या प्रकरणी कोणतेही स्पष्टीकरण नाही, असे समजून पुढील कार्यवाही करण्यात येईल, असेही विभागाने स्पष्ट केले आहे. यानंतर विभागाकडून कोणतीही नोटीस दिली जात नसल्याचेही त्यात नमूद करण्यात आले आहे.

दरम्यान, खेडकर हिला केंद्रीय लोकसेवा आयोगाने बडतर्फ केल्यानंतर दिल्ली उच्च न्यायालयात उच्च न्यायालयाने दाखल झालेल्या गुन्ह्यात अटकेपासून संरक्षण दिले आहे. या प्रकरणी पुढील सुनावणी बुधवारी होणार आहे.