मुलीचा विधानसभा लढायला नकार, नाईलाजाने मलाच विधानसभा लढायला लागेल : दिलीप वळसे पाटील

मंचर (पुणे) : मागील ३५ वर्षांपासून मला तुम्ही आंबेगावचे प्रतिनिधित्व करण्याची संधी दिलीत. मी देखील संधीचा पुरेपूर उपयोग करून तालुक्याच्या विकासासाठी काम केले. अनेक प्रश्न मार्गी लागले, काही प्रश्न प्रलंबित आहे. विधानसभा निवडणूक तोंडावर आहे. यंदाची निवडणूक मी लढवणार नाही, अशा अफवा विरोधक पसरवत आहेत. माझी मुलगी विधानसभा लढणार, असे ते सांगत आहेत. परंतु माझ्या मुलीने निवडणूक लढण्यास नकार दिला असल्याने नाईलास्तव मला निवडणूक लढायला लागेल, असे मंत्री दिलीप वळसे पाटील यांनी स्पष्ट केले.

अजित पवार यांच्या नेतृत्वाखालील राष्ट्रवादी काँग्रेसची जनसन्मान यात्रा रविवारी मंचरला होती. या कार्यक्रमाला उपमुख्यमंत्री अजित पवार, प्रदेशाध्यक्ष सुनील तटकरे, मंत्री दिलीप वळसे पाटील, माजी खासदार शिवाजीराव आढळराव पाटील, रुपाली चाकणकर आदी नेते उपस्थित होते. महिला भगिनींची कार्यक्रमाला लक्षणीय उपस्थिती होती.
साहेबराव पाटील यांचा अजित पवारांना चकवा, फोनही घेतला नाही, दादा काही मिनिटांतच तावातावाने घराबाहेर पडले!

दिलीप वळसे पाटील म्हणाले, मी विधानसभा निवडणूक लढविणार नाही, अशा कंड्या अनेक जण पिकवित आहेत. माझी लेक विधानसभा लढविणार असल्याचे ते सांगत आहेत. परंतु विधानसभा लढण्यास इच्छुक नसल्याचे तिने स्पष्टपणे सांगितले असल्याने नाईलाजाने मलाच विधानसभा लढायला लागेल, असे दिलीप वळसे पाटील यांनी जनतेसमोर स्पष्ट केले.
Ajit Pawar: परत या ना आपल्या राष्ट्रवादीत! भरसभेत कार्यकर्त्याचं साकडं; भाषण थांबवून दादांनी काय केलं?

अजित पवार काय म्हणाले?

सूर्योदय होण्याआधीच मी कामाला लागतो जेणेकरून दिवसभरात अनेक विकासकामांचा आढावा घेता यावा. सर्वसामान्यांशी भेटीगाठी करता याव्यात. मुख्यमंत्री माझी लाडकी बहीण योजनेला राज्यभरातून मिळणारा प्रतिसाद समाधानकारक आहे. ही योजना यशस्वी ठरत आहे, मात्र विरोधकांना हे मान्यच करायचं नाही. मुलींसाठी आम्ही शिक्षण मोफत केलं. जेणेकरून त्यांची मोठी स्वप्नं पूर्ण होण्यास आमचा हातभार लागावा. तीन गॅस सिलिंडर सुद्धा मोफत द्यायचं ठरलंय. लाडक्या भावांसाठी सुद्धा आम्ही निर्णय घेतले. शेतकऱ्यांचं वीज बिल आम्ही माफ केलं. साडेआठ लाख सोलार पंप शेतकऱ्यांना देण्याचा निर्णय घेतला.

राज्यातील मागासवर्गीय, आदिवासी बांधव, वंचितांना चालू योजनांचा लाभ घेता यावा, याकरिता आम्ही त्या योजनांची माहिती जनतेपर्यंत पोहोचवण्यासाठी ही जनसन्मान यात्रा काढली आहे. ह्या योजना निरंतर सुरूच रहाव्यात म्हणून आमच्या विचारांचे उमेदवार जनतेनं, माझ्या बहिणींनी निवडून द्यावेत हीच विनंती आहे.