कोण आहे अक्षय शिंदे, ज्या नराधमाने बदलापुरात चिमुकल्यांसोबत केलं दृष्कृत्य

बदलापूर : बदलापूर शहरातील एका नामांकित शाळेत चार आणि सहा वर्षीय चिमुकलींवर लैंगिक अत्याचार करण्यात आला. या धक्कादायक घटनेनंतर संपूर्ण शहरात संतापाची लाट उसळली असून लोक रस्त्यावर उतरले आहेत. संतप्त जनतेने या प्रकाराबाबत रोष व्यक्त करत शाळेबाहेर तसंच रेल्वे रुळावर उतरुन आंदोलन केलं. यावेळी आरोपीला फाशीची शिक्षा करण्याची मागणी करण्यात आली.

संपूर्ण प्रकार कसा समोर आला?

चिमुकलीने आईला तिच्या गुप्तांगात त्रास होत असल्याचं सांगितलं. तिथे मुंग्या चावतात असं सांगितलं. त्यानंतर आईने चिमुकलीला डॉक्टरकडे नेलं आणि तिथे हा संपूर्ण प्रकार उघड झाला. आपल्या लेकीसोबत घडलेल्या घटनेनंतर पालकांना मोठा धक्का बसला. दुसरीकडे आणखी एका चिमुकलीने तिच्या पालकांना गुप्तांगाजवळ त्रास होत असल्याचं सांगितलं. तसंच ती मुलगी शाळेत जाण्यासाठीही तयार होत नव्हती. खोलवर जात पालकांनी याचा तपास केल्यानंतर त्यांना आपल्या लेकीसोबत काय घडलं हे समजलं. ही घटना समोर आली आणि संपूर्ण बदलापूर हादरलं.
Raj Thackeray : संताप आणणारा प्रकार, गुन्हा दाखल करुन घेण्यातच पोलिसांनी १२ तास का लावले? राज ठाकरेंचा सवाल

चिमुकल्यांवर अत्याचार करणारा आरोपी कोण?

विद्येचं मंदिर असलेल्या शाळेतच एका शाळेतील व्यक्तीकडून निर्घुण कृत्य करण्यात आलं. एका तीन वर्ष आठ महिने आणि सहा वर्षांच्या चिमुकलींवर शाळेत काम करणाऱ्या अक्षय शिंदे या आरोपीने लैंगिक अत्याचार केला. ही घटना १३ ऑगस्ट रोजी उघडकीस आली.
Bharat Bandh : उद्या, २१ ऑगस्ट रोजी ‘भारत बंद’ची घोषणा; काय सुरू काय बंद? जाणून घ्या सर्व अपडेट
आरोपी अक्षय शिंदेने दोन्ही मुलींवर लैंगिक अत्याचार केल्याची माहिती आहे. हा २४ वर्षीय आरोपी शाळेतच सफाई कर्मचारी म्हणून काम करत होता. सफाईसाठी नेमणूक करणाऱ्या कंपनीकडून त्याची शाळेत सफाई कर्मचारी म्हणून नेमणूक झाल्याची माहिती मिळत आहे.

चिमुकल्यांनी त्यांना त्रास होत असल्याची माहिती दिल्यानंतर त्यांना रुग्णालयात नेण्यात आलं आणि संपूर्ण घटना समोर आली. त्यानंतर पालक पोलीस तक्रार करण्यासाठी पोहोचले, मात्र तब्बल १२ तास त्यांची तक्रार घेण्यात आली नाही. इतक्या मोठ्या गुन्ह्यातही पोलिसांनी तक्रार दाखल करुन घेण्यास अत्यंत विलंब केल्याने पोलीस महिलेची तात्काळ बदली करण्यात आली आहे. दुसरीकडे शाळेतील दोन महिला कर्मचाऱ्यांनाही काढण्यात आलं आहे.