अंबरनाथमध्ये थरारक हिट अँड रनची घटना; कार चालकाने गाडीला ठोकले,अनेकांना चिरडले

बदलापूर: मंगळवार सकाळपासून फक्त महाराष्ट्रातच नाही तर संपूर्ण देशात बदलापूर शहराची चर्चा आहे. येथील एका शाळेतील कर्मचाऱ्याकडून दोन मुलींवर झालेल्या अत्याचारानंतर पालक आणि नागरिकांनी शाळेसमोर आंदोलन केल्यानंतर संतप्त जमावाने तब्बल ९ ते १० तास बदलापूर रेल्वे स्थानकावर आंदोलन केले. अखेर पोलिसांनी लाठीचार्ज करून आंदोलकांना हटवले. ही घटना शांत होते नाही पाठोपाठ अंबरनाथमधून डोकं सुन्न करणारी एक घटना समोर आली आहे.

या घटनेचा व्हिडिओ समोर आला असून ज्यात दोन गाड्या दिसत आहेत आणि आजूबाजूला काही लोकांची तसेच इतर गाड्यांची गर्दी आहे. दोन चार चाकी गाड्या आहेत ज्यामध्ये एक गाडी काळ्या रंगाची तर दुसरी पांढऱ्या रंगाची आहे. यातील काळ्या रंगाच्या गाडीचा चालक वेगाने येऊन पांढऱ्या रंगाच्या गाडीला घासून पुढे जातो. हा प्रकार अशा वेळी घडतो जेव्हा पांढऱ्या रंगाच्या गाडीतील चालक गाडीचा दरवाजा उघडून बाहेर थांबला होता. त्या ठिकाणी तिघे उभे होते, त्यांना उडवून चालक वेगाने गाडी मीटर पुढे घेऊन जातो. यूटर्न घेऊन तो पुन्हा माघारी येत असताना तेथे उभ्या असलेल्या एका व्यक्तीला चालकाने उडवले.
Pune Crime News: बदलापुरनंतर आता पुण्यात संतापजनक प्रकार; नामांकित शाळेतच अल्पवयीन मुलीवर अत्याचाराचा प्रयत्न, १९ वर्षीय विद्यार्थ्याला अटक

यूटर्न घेऊन कार चालक पुन्हा वेगाने येत पांढऱ्या रंगाच्या गाडीला समोरून वेगाने धडक देतो. यात पांढऱ्या रंगाची गाडी काही अंतर मागे जाते. पांढऱ्या गाडीच्या मागे दुचाकीवर उभे असलेले दोघे जण गाडीच्या चाकाखाली येतात. ते दोघेही फरफटत जातात. या दुचाकीच्या मागे काही अंतरावर उभे असलेल्या अन्य एका दुचाकीवर एक पुरुष आणि महिला होती त्यांना देखील धडक बसते आणि ते दोघेही खाली पडतात. दरम्यान काळ्या रंगाच्या गाडीच्या चालकाने जेव्हा दुसऱ्यांदा धडक दिली तेव्हा गाडीच्या खाली एक लहान मुलगा आला. त्याला नंतर एका व्यक्ती उचलून घेऊन जाताना व्हिडिओमध्ये दिसत आहे.

हा सर्व प्रकार झाल्यावर एक व्यक्ती काळ्या रंगाच्या गाडीच्या पुढच्या चाकावर दगड टाकताना दिसत आहे. या सर्व घटनेत काही महिला देखील दिसत आहेत. पांढऱ्या रंगाच्या गाडीत काही महिला आणि लहान मुले असल्याचे व्हिडिओत दिसत आहेत. प्राथमिक माहितीनुसार हे दोन्ही कुटुंबीय मुंबईचे असल्याचे कळते. या दोन कुटुंबातील वादामुळे हा प्रकार घडल्याचे कळते. दरम्यान यात दोन जण जखमी झाले असून त्यांना उपचारासाठी रुग्णालयात दाखल करण्यात आले आहे. घटनास्थळी पोलीस दाखल झाले असून याबाबत अद्याप नेमकी माहिती मिळाली नाही.