असंवेदनशीलता! चिमुकलीच्या गरोदर आईला १० तास पोलीस ठाण्यात थांबवलं, आता रुग्णालयात दाखल

ठाणे: बदलापुरातील शाळेत साडे तीन वर्षांच्या दोन चिमुकलींवर लैंगिक अत्याचार झाल्याची संतापजनक घटना घडली. या घटनेनंतर बदलापुरात संतापाची लाट उसळली. पालकांनी तीव्र आंदोलन केलं. या प्रकरणाची तक्रार दाखल केल्यानंतरही गुन्हा दाखल करुन घेण्यास पोलिसांनी तब्बल १० ते १२ तास लावले. त्यावरुनही पोलिसांवर मोठ्या प्रमाणात टीका करण्यात आली, तर यासंबंधित पोलिसांची बदली करण्यात आली. यावेळी धक्कादायक बाब म्हणजे या दोन मुलींपैकी एका मुलीची आई गर्भवती असतानाही त्यांनी पोलीस ठाण्यात १० तास थांबवून ठेवण्यात आले.

पीडित चिमुकलीची गर्भवती आई रुग्णालयात

या गर्भवती आईला आधीच आपल्या मुलीसोबत जे घडलं त्यामुळे मोठा धक्का बसला होता. त्यानंतर तिला पोलीस ठाण्यात इतके तास ताटकळत थांबावं लागलं. सध्या तला रुग्णालयात भर्ती करण्यात आलं असून तिला १०२ ताप असल्याची माहितीही नातेवाईकाने दिली आहे.

इंडियन एक्सप्रेसच्या वृत्तानुसार, एका नातेवाईकाने सांगितलं की, सर्वप्रथम आम्ही मुलीची वात्सल्य रुग्णालयात आरोग्य तपासणी करुन घेतली. जेव्हा तिच्यावर लैंगिक अत्याचार झाल्याचं समोर आलं तेव्हा पुन्हा एकदा सरकारी रुग्णालयातून आरोग्य तपासणी करण्यात आली. पोलीस ठाण्यात जबाब नोंदवणे, वेद्यकीय तपासणी करणे ही सारी प्रक्रिया पीडित मुलगी आणि तिच्या आईसाठी अत्यंत तणावपूर्ण होती.

पीडित कुटुंबाप्रती पोलिसांची असंवेदनशीलता

जिच्यावर लैंगिक अत्याचार झाला ती खूप लहान मुलगी होती. तरीही पोलिसांनी तिच्याप्रती किंवा तिच्या कुटुंबाप्रती कुठल्याही प्रकारची संवेदनशीलता दाखवलेली नाही. याउलट गुन्हा दाखल करण्यासाठीही उशीर केला गेला, असा आरोप नातेवाईकाने केला आहे.

गुन्हा दाखल करण्यात पोलिसांनी १० तास लावले, हेच बदलापुरातील उद्रेकाचं मुख्य कारण ठरलं आणि बदलापूरकरांनी तीव्र आंदोलन पुकारलं. तात्काळ कारवाई करण्याची मागणी हे आंदोलनकर्ते करत होते.

गुन्हा दाखल करण्यात विलंब झाला नाही – पोलीस अधिकारी

तर, एका वरिष्ठ अधिकाऱ्याने दिलेल्या माहितीनुसार, गुन्हा दाखल करण्यात कुठल्याही प्रकारची दिरंगाई करण्यात आलेली नाही. तक्रार मिळाल्यानंतर पीडित मुलीच्या पालकांचे जबाब नोंदवण्यात आले आणि कारवाईला सुरुवात करण्यात आली.