Tej Police Times
आरोपीच्या कोठडीत वाढ ते आंदोलनातील नागरिकांची चौकशी; बदलापूर प्रकरणी शंभूराज देसाईंची माहिती
प्रदीप भणगे, बदलापूर : बदलापुरात दोन चिमुकल्यांवर शाळेत एका सफाई कर्मचाऱ्याने लैंगिक अत्याचार केले. याप्रकरणी बदलापुरसह संपूर्ण महाराष्ट्रात संतापाची लाट उसळली आहे. चिमुकल्यांवर अत्याचार झाल्यानंतर तब्बल १२ तास तिच्या आई-वडिलांना बसवून ठेवण्यात आलं होतं. इतक्या गंभीर गुन्ह्यात पोलिसांनी तक्रार घेण्यास १२ तास लावले. तक्रार केल्यानंतरही आरोपीविरोधात कोणतीही दखल घेतली न गेल्याने शहरात तीव्र आंदोलन करण्यात आलं. आंदोलनाला हिंसक वळण लागलं. सरकारलाही या आंदोलनाची दखल घ्यावी लागली असून आंदोलनानंतर काही नेत्यांनी बदलापूर पोलिसात तसंच याप्रकरणाविरोधात भेट दिली. नुकतंच कुळगाव-बदलापूर येथील नगरपालिका सभागृहात पालकमंत्री शंभूराज देसाई यांची पत्रकार परिषद पार पडली. यावेळी त्यांनी बोलताना या प्रकरणात आतापर्यंत केलेल्या कारवाईबाबत सांगत महत्त्वाची माहिती दिली आहे.
आरोपीच्या पोलीस कोठडीत वाढ
शंभूराज देसाई यांनी याबाबत बोलताना सांगितलं, की या प्रकरणातील आरोपीला अटक करण्यात आली असून त्याची पोलीस कोठडी वाढवण्यात आली आहे. तसंच हा आरोपी शाळेने नियुक्त केलेला कर्मचारी नव्हता, तर खाजगी कर्मचारी होता. शाळा, कॉलेज, हॉस्टेल इथे खाजगी कर्मचाऱ्यांची नेमणूक करताना त्यांची पोलीस पडताळणी सादर करणं गरजेचं असल्याचं ते म्हणाले.
तसंच शाळेचं सीसीटीव्ही फुटेज उपलब्ध झाले नाहीत, हा शाळेचा हलगर्जीपणा आहे. याप्रकरणात मुख्याध्यापक, शिक्षक यांचं निलंबन केलं आहे. हा खटला फास्ट ट्रॅक कोर्टात चालवला जाणार आहे. यासाठी IPS आर. पी. सिंग अधिकारी यांची एस. आय. टी. प्रमुख म्हणून नियुक्ती करण्यात आली आहे. प्रकरणात सखोल चौकशी करण्याचे आदेश देण्यात आले आहे. या आरोपीला शंभर टक्के फाशी होईल, असं सांगत त्यांनी सर्व बाबी न्यायालयासमोर मांडण्यात येणार असल्याचं म्हटलं. तसंच या आरोपीने या अगोदर आणखी काही गुन्हे केले आहेत का? याचा तपास चालू असल्याची माहितीही त्यांनी दिली.
Who is Akshay Shinde : कोण आहे अक्षय शिंदे, ज्या नराधमाने बदलापुरात चिमुकल्यांसोबत केलं दृष्कृत्य
आंदोलनातील नागरिकांची चौकशी
आंदोलनाबाबत बोलताना शंभूराज देसाई म्हणाले, की या रेल रोकोमध्ये विद्यार्थी आणि जेष्ठ नागरिकांचे खूप हाल झाले. रेल्वे आंदोलनामध्ये बदलापूरचे स्थानिक लोक नव्हते. त्यांच्या हातात “मुख्यमंत्री-लाडकी बहीण” योजनेचे बॅनर होते. त्यामुळे या आंदोलनात सहभागी झालेल्या नागरिकांची सखोल चौकशी करण्यात येणार आहे. पोलिसांकडे आंदोलनात सहभागी झालेल्या नागरिकांचे व्हिडिओ आहेत. पोलीस व्हिडिओ पाहून गुन्हे दाखल करत आहेत.
शाळा, कॉलेज या ठिकाणी साध्या वेशातील पोलीस पाहणी करत असून मुलींची छेडछाड होते का? यावर ते लक्ष ठेवून आहेत. पोलिसांना पेट्रोलिंग करण्याचे आदेश देण्यात आले आहेत. प्रशासनाने संयम काय असतो ते दाखवून दिले. रेल्वे प्रवाशांचे खूप हाल होत होते म्हणून रेल्वे जमाव पांगवण्यात आला. पोलिसांवर दगडफेक करणाऱ्या व्यक्तींचा शोध सुरू आहे. आंदोलनाच्या मागे कोण आहे, याचा तपास सुरू असल्याचं शंभूराज देसाई म्हणाले.