तिकिटं वाटून राज ठाकरे निघाले, मनसेच्या बैठकीत हाणामारी, नेटिझन म्हणतात, कुत्र्यासारखं हाणलंय

चंद्रपूर : राजुरा विधानसभा मतदारसंघासाठी मनसेकडून सचिन भोयर यांना उमेदवारी जाहीर करण्यात आली. पण, बाहेरचा उमेदवार दिल्याचा आरोप उपाध्यक्ष प्रकाश बोरकर यांच्या समर्थकांनी करीत आक्षेप नोंदविला. यावरून दोन गट आमने-सामने आल्याने मनसेच्या चंद्रपुरातील आढावा बैठकीतच राडा झाला. विशेष म्हणजे, मनसे अध्यक्ष राज ठाकरे काही क्षणापूर्वीच या बैठकीतून बाहेर पडले होते.

चंद्रपूर येथील एनडी हॉटेलमध्ये गुरुवारी विधानसभा निवडणुकीसंदर्भात महाराष्ट्र नवनिर्माण सेनेच्या प्रमुख पदाधिकाऱ्यांची आढावा बैठक राज ठाकरे यांनी घेतली. या बैठकीला मनसेचे युवा नेते अमित ठाकरे, चंद्रपूर जिल्हाध्यक्ष मनदीप रोडे, राहुल बालमवार, चंद्रपूर शहराध्यक्ष सचिन भोयर यांच्यासह पदाधिकारी प्रामुख्याने उपस्थित होते.

आगामी विधानसभा निवडणूक काही महिन्यात अपेक्षित असल्यामुळे वेळ कमी उरलेला आहे. या कमी वेळातच अधिक गतीने काम करा. महाराष्ट्र नवनिर्माण सेनेचे विचार जिल्ह्यातील गावोगावी, घराघरापर्यंत पोहोचविण्याकरिता प्रत्येक मनसैनिकांनी आजपासूनच सज्ज व्हा, असे आवाहन राज यांनी केले. यानंतर चंद्रपुरातून मनदीप रोडे, राजुऱ्यातून सचिन भोयर यांना उमेदवारी जाहीर केली.
Pune Cantonment : ठाकरे गटातून काँग्रेसमध्ये प्रवेश, आंबेडकरी चळवळ कार्यकर्ता विधानसभेला, पुण्यात मोठी घडामोड

राज ठाकरे काय म्हणाले?

नवनिर्माण यात्रेत आज चंद्रपूरला महाराष्ट्र नवनिर्माण सेनेच्या पदाधिकाऱ्यांशी संवाद साधला. आगामी विधानसभा निवडणूक ही इतर निवडणुकांपेक्षा वेगळी असणार आहे. यांत लोकं सध्या सत्तेत असलेले आणि विरोधी पक्ष म्हणवून घेणाऱ्यांना पुरते कंटाळले आहेत आणि त्यांना त्यांची जागा दाखवणार आहे. महाराष्ट्र नवनिर्माण सेनेला या निवडणुकीत अफाट संधी आहे कारण महाराष्ट्र नवनिर्माण सेनेने कधीही कुठल्याही फायद्यासाठी, स्वार्थासाठी, पदासाठी कधीच काही केलं नाही. त्यामुळे इतर पक्षांचे उमेदवार सोडा कोणाला कुठल्या जागा मिळतील हे देखील ठरत नसताना, महाराष्ट्र नवनिर्माण सेना उमेदवार घोषित करत आहे. आणि मराठवाडा असो की विदर्भात नवनिर्माण यात्रेला मिळणारा उदंड आणि उस्फुर्त प्रतिसादाची जाणीव पदाधिकाऱ्यांना करून दिली. आणि चंद्रपूर, राजुरा विधानसभेसाठी महाराष्ट्र नवनिर्माण सेनेचे उमेदवार पण घोषित केले.

राज ठाकरे यांनी केलेल्या ट्विटवर नेटिझन्सनी कमेंट्सचा पाऊस पाडला आहे. कुणी म्हणतंय, “साहेब तुम्ही निघून गेल्यावर तिथं तुमचा कार्यकर्त्यांमध्ये तुंबळ मारामाऱ्या झाल्या” तर कुणी “साहेबांना माहिती आहे की नाही , कार्यकर्त्यांनी एकमेकांना कुत्र्या सारखं हानलं? अशी भांडण करू नये , माफी मागा एकमेकांची ,पक्ष वाढवायचा आहे तुम्हाला” असं म्हटलं आहे.
Supriya Sule : मंचावरचे चेहरे मंत्रिमंडळात दिसणार, सुप्रिया सुळेंची टिपण्णी अन् काँग्रेस नेत्याची कळी खुलली
भोयर यांच्या उमेदवारीवर राजुऱ्याचे उपाध्यक्ष प्रकाश बोरकर समर्थकांनी आक्षेप नोंदविला. यावरून हाणामारी झाली. राजुऱ्यासाठी बोरकर हे इच्छुक असल्याची माहिती आहे. भोयर हे चंद्रपुरात असतात. त्यामुळे राजुरा विधानसभेत स्थानिक उमेदवार द्यावा, अशी मागणी करीत राजुरा विधानसभेतील कार्यकर्ते विरोधात उतरले. आता राज ठाकरे यावर काय भूमिका घेतात आणि शिस्त लावण्यासाठी काय करतात, याकडे सर्वांचे लक्ष लागले आहे.