सांगली शहरात अल्पवयीन मुलीवरील बलात्कार; पॅरोल बाहेर आलेल्या गुन्हेगाराने १४ वर्षाच्या मुलीवर केले अत्याचार

सांगली: राज्यात विरोधी पक्षांकडून महिलांवर होणाऱ्या अत्याचाराच्या विरोधात मूक आंदोलन सुरू असताना एका अल्पवयीन मुलीवर अत्याचार झाल्याची घटना समोर आली आहे. गेल्या काही दिवसांपासून राज्यातील विविध ठिकाणी महिला आणि मुलांवर अत्याचार झाल्याच्या घटना समोर येत आहेत.

सांगली शहर आज पुन्हा एकदा अल्पवयीन मुलीवरील बलात्काराच्या घटनेने हादरले. एका 14 वर्षीय अल्पवयीन मुलीवर संजय माने या 35 वर्षीय संशयिताने बलात्कार केल्याची घटना उघडकीस आली आहे. या प्रकरणी संजयनगर पोलिसांनी तातडीने पाऊले उचलत आरोपी संजय माने यास आटपाडी येथून ताब्यात घेतले आहे. घटनेनंतर आरोपीला फाशी देण्याची मागणी करत पोलीस स्टेशन समोर घोषणाबाजी केली. काँग्रेस नेत्या जयश्री पाटील, भाजपा नेते शिवाजी डोंगरे यांनी पोलीस अधिकाऱ्यांची भेट घेत आरोपावर तातडीने कारवाईची मागणी केली.
Raj Thackeray Latest News: शरद पवार हे महाराष्ट्रातील जातीवादी राजकारणाचे जनक- राज ठाकरेंचा हल्लाबोल; विधानसभेत जनता धडा शिकवेल
दरम्यान या घटनेनंतर तातडीने संजयनगर पोलिसांनी आरोपी संजय माने यास गुन्हा दाखल होताच 2 तासात ताब्यात घेतले. संशयित आरोपी संजय माने 2011 साली प्रिया हॉटेल समोर झालेल्या खुनाच्या गुन्ह्यातील आरोपी असून त्याला 14 वर्षाची शिक्षा लागली आहे. तो सध्या पॅरोल रजेवर आला होता.

मागील महिन्यात त्याने पीडित मुलीस तू मला आवडतेस, असे म्हणून विनयभंग केला होता. त्याबाबत पीडित मुलीने कुठेही वाच्यता केली नाही. काल 23 ऑगस्ट रोजी रात्री साडे नऊच्या सुमारास त्याने पीडित मुलीला बोलावून तिला जबरदस्तीने आपल्या घरात नेऊन तिच्यावर लैंगिक अत्याचार केले. तसेच याबाबत कुठे वाच्यता करू नये म्हणून धमकी दिली. आज सकाळी हा प्रकार उघडकीस आल्यानंतर पीडित मुलीच्या आईने पोलिसात तक्रार दिली. तक्रार दिल्यानंतर तीन पथकाच्या माध्यमातून अवघ्या दीड तासात आरोपी संजय माने यास आटपाडी येथून ताब्यात घेतले.

दरम्यान घटनेची माहिती मिळताच स्थानिक नागरिकांनी आणि पीडित मुलीच्या नातेवाईकांनी संजय नगर पोलीस ठाण्याच्या आवारात गर्दी करीत आरोपीवर कडक कारवाई करत घोषणबाजी केली.