Tej Police Times
तुम्ही माझ्या गाडीत बसा, कोल्हेंना सूचना, हर्षवर्धन पाटलांशी राजकीय चर्चा, पवारांचा भाजपला शह
पुणे : भारतीय जनता पक्षातील नाराज नेते हेरून विधानसभेच्या तोंडावर सत्ताधाऱ्यांना जोरदार शह देण्याची मोहिम ज्येष्ठ नेते तथा मूळ राष्ट्रवादीचे अध्यक्ष शरद पवार यांनी आखली आहे. भाजपमध्ये राहून विधानसभेची उमेदवारी मिळणार नाही, याचा अंदाज आल्याने हर्षवर्धन पाटील यांनी ‘पुढची पावले’ टाकायला सुरुवात केली आहे. तर दुसरीकडे शरीराने भाजपमध्ये असलेले पण मनाने महाविकास आघाडीचे काम करणारे अहमदनगरचे युवा नेते विवेक कोल्हे यांनी शरद पवार यांची भेट घेतली. त्यामुळे लोकसभेच्या यशाने शरद पवारांच्या तुतारीचे मार्केट चांगलेच वाढल्याचे बोलले जात आहे.
शरद पवार यांच्या अध्यक्षतेखाली वसंतदादा शुगर इन्स्टिट्यूटची बैठक पुण्यातील मांजरी येथे संपन्न झाली. या बैठकीला साखर संघाचे राष्ट्रीय अध्यक्ष हर्षवर्धन पाटील, ज्येष्ठ नेते दिलीप देशमुख आदी महत्त्वाचे नेते उपस्थित होते. आढावा बैठक आटोपल्यानंतर हर्षवर्धन पाटील आणि शरद पवार यांची बंद दाराआड चर्चा झाली. हर्षवर्धन पाटील यांच्या राष्ट्रवादी प्रवेशाच्या चर्चांनी जोर धरलेला असताना या भेटीला वेगळे महत्त्व प्राप्त झाले. तर विवेक कोल्हे यांना आपल्या गाडीतून प्रवास करण्याची सूचना शरद पवार यांनी केल्याने नगरच्या राजकारणात देखील मोठे उलटफेर होतील, असे बोलले जात आहे.
हर्षवर्धन पाटील यांची भाजपमध्ये घुसमट का होतेय?
हर्षवर्धन पाटील हे राज्यातले ज्येष्ठ नेते. १९९५ सालच्या सेना भाजप युतीच्या सरकारमध्ये ते मंत्री होते. १९९९ पासून २०१४ पर्यंत त्यांनी इंदापूरचे प्रतिनिधित्व केले. दरम्यानच्या आघाडी सरकारच्या काळात त्यांनी महत्त्वाची मंत्रिपदे भूषवली. परंतु आघाडीमधूनच इंदापुरात त्यांना आव्हान दिले जायचे. अजित पवार यांचे निकटवर्तीय, माजी जि.प. अध्यक्ष दत्ता भरणे यांना दादांनी वेळोवेळी बळ दिले. २०१४ च्या विधानसभा निवडणुकीत सगळे पक्ष वेगवेगळे लढल्याने राष्ट्रवादीचे उमेदवार दत्ता भरणे यांनी काँग्रेस पक्षाच्या तिकीटावर उभे असलेले हर्षवर्धन पाटील यांचा पराभव केला. पुढे २०१९ ला आघाडीत विद्यमान आमदार म्हणून भरणे यांनाच तिकीट देण्याचे संकेत आघाडीतील नेत्यांनी दिले. त्यामुळे हर्षवर्धन पाटील यांनी भाजपची वाट धरली.
हर्षवर्धन पाटील तुतारी फुंकणार, सुप्रिया सुळे यांच्या विधानाने चर्चांना उधाण, भाजपला सलग दुसरा मोठा धक्का?
दरम्यान, हर्षवर्धन पाटील यांनी भाजपमधली पाच वर्षे बऱ्यापैकी शांततेत घालवली. काँग्रेसमध्ये असताना त्यांचा रुबाब असायचा मात्र भाजपमध्ये गेल्यावर ते बातम्यांमधून बाहेर फेकले गेले. एवढे कमी म्हणून की काय, अजितदादांच्या महायुतीतील एन्ट्रीने पुन्हा विद्यमान आमदार म्हणून भरणे यांनाच तिकीट मिळणार असल्याचे जवळपास निश्चित झाल्याने त्यांची अधिक घुसमट झाली. त्याचमुळे त्यांनी शरद पवार यांच्या नेतृत्वाखालील राष्ट्रवादी काँग्रेसमध्ये प्रवेश करून भरणे यांच्याशी दोन करण्याचा निर्णय घेतल्याचे कळते आहे.MH Election 2024 : हर्षवर्धन पाटलांना जायचं असेल तर ते जावू शकता, बावनकुळेंचं मोठं विधान
विवेक कोल्हे यांच्या मनात काय?
शरद पवार यांनी विवेक कोल्हे यांना वसंतदादा शुगर इन्स्टिट्यूटच्या बॉडीवर काम करण्याची संधी दिल्याने मंगळवारी पार पडलेल्या वसंतदादा शुगर इन्स्टिट्यूटच्या बैठकीच्या निमित्ताने शरद पवार आणि विवेक कोल्हे यांची भेट झाली. बैठकीनंतर ‘माझ्या गाडीत बसा’ अशी सूचना पवार यांनी कोल्हेंना केली. विवेक कोल्हे हे कोपरगावचे युवा राजकारणी. त्यांच्या मातोश्री स्नेहलता कोल्हे या कोपरगावच्या माजी भाजपच्या आमदार. परंतु २०१९ च्या विधानसभा निवडणुकीत राष्ट्रवादीच्या आशुतोष काळे यांनी स्नेहलता कोल्हे यांचा पराभव केला.
राष्ट्रवादीतील फुटीनंतर आशुतोष काळे यांनी अजित पवार यांना साथ देण्याचा निर्णय घेतला. महायुतीत ज्याचा विद्यमान आमदार, त्याला तिथली जागा असे सूत्र ठरलेले असताना आपल्याला कोपरगाव विधानसभेची जागा लढायला मिळणार नाही, याची खात्री पटल्याने विवेक कोल्हे पर्यायाच्या शोधात होते. अखेर हा शोध संपल्यात जमा आहे. कारण लवकरच ते शरद पवार यांच्या पक्षात प्रवेश करून विधानसभेची तयारी सुरू करतील, असे बोलले जात आहे.