Tej Police Times
नंदुरबारमधील ‘या’ विधानसभा मतदारसंघावर राष्ट्रवादीने ठोकला दावा, जिल्हाध्यक्ष डॉ. अभिजीत मोरे म्हणाले…
महेश पाटील, नंदुरबार : नंदुरबार जिल्ह्यातील नवापूर आणि अक्कलकुवा-अक्रानी विधानसभा मतदारसंघावर राष्ट्रवादीने दावा ठोकला असून उपमुख्यमंत्री अजित पवार यांच्याकडे मागणी केली असल्याची माहिती राष्ट्रवादीचे जिल्हाध्यक्ष डॉ. अभिजीत मोरे यांनी दिली. तसेच वरिष्ठांनी आदेश दिले तर विधानसभेच्या चारही जागांवर उमेदवार देण्याची तयारी असून ती निवडूनही आणण्याची ताकद असल्याचे त्यांनी सांगितले.नंदुरबार लोकसभेत सहा विधानसभा मतदारसंघ येतात. साक्री आणि शिरपूर मतदारसंघ हा धुळे जिल्ह्यात येतो तर नंदुरबार जिल्ह्यात नंदुरबार, शहादा- तळोदा, अक्कलकुवा- अक्रानी आणि नवापूर असे चार विधानसभा क्षेत्र आहेत. यात अक्कलकुवा-अक्रानी आणि नवापूर येथे काँग्रेसचे आमदार आहेत. तर नंदुरबार, शहादा-तळोदा या ठिकाणी भाजपचे आमदार आहेत. दरम्यान, नंदुरबार जिल्ह्यातील नवापूर आणि अक्कलकुवा-अक्रानी विधानसभा मतदारसंघावर राष्ट्रवादीने दावा ठोकला असून हे मतदार संघ मिळण्यासाठी विशेष आग्रही आहेत. याबाबत राष्ट्रवादीचे जिल्हाध्यक्ष डॉ. अभिजीत मोरे यांनी मुख्यमंत्री अजित पवार यांच्याकडे या जागेसाठी आग्रह धरला आहे. तसेच वरिष्ठांनी आदेश दिले तर जिल्ह्यातील चारही विधानसभा क्षेत्रात उमेदवार देण्याची तयारी असून उमेदवार निवडून आणण्याची ताकद असल्याचे राष्ट्रवादीचे जिल्हाध्यक्ष डॉ.अभिजीत मोरे यांनी सांगितले.
भाजपच्या जागेवर राष्ट्रवादीचा डोळा
भाजपच्या जागेवर राष्ट्रवादीचा डोळा
जिल्ह्यातील नवापूर विधानसभा क्षेत्रात काँग्रेसचा उमेदवार मागील पंचवार्षिकमध्ये निवडून आला होता. गेल्या १० वर्षापासून ही जागा भाजपला सुटत आहे. मात्र त्या ठिकाणी त्यांचा उमेदवार विजयी झाला नाही. त्यामुळे अजित पवार यांच्या राष्ट्रवादीने नवापूर विधानसभा क्षेत्राची जागा राष्ट्रवादीला मिळावी अशी मागणी केली आहे. त्यासोबत शिंदे सेनेनेही नवापूरच्या जागेवर धावा ठोकला आहे.
शिंदे शिवसेना आणि राष्ट्रवादीमध्ये रस्सीखेच
राज्यातील पहिला विधानसभा मतदारसंघ असलेला अक्कलकुवा-अक्रानी मतदारसंघ आहे. या मतदारसंघात काँग्रेसचे आमदार गेल्या सहा टर्मपासून निवडून येत आहेत. या मतदारसंघात २०१९ मध्ये शिवसेनेतर्फे आ.आमश्या पाडवी यांनी उमेदवारी केली होती. त्यांचा थोड्या फरकाने पराभव झाला होता. या विधानसभा मतदारसंघासाठी शिंदे शिवसेनेने जोरदार तयारी केली आहे. मात्र, या मतदारसंघावर राष्ट्रवादीने दावा ठोकला आहे. या मतदारसंघातील काँग्रेसचे जिल्हा परिषदेचे विरोधी पक्षनेते तसेच माजी सभापती रतन पाडवी यांनी काही महिन्यांपूर्वी राष्ट्रवादीत प्रवेश केला. तेही विधानसभा लढण्याच्या तयारीत आहेत. त्यातच या विधानसभा क्षेत्राचा आढावा घेण्यासाठी २९ ऑगस्ट रोजी खासदार श्रीकांत शिंदे यांच्या उपस्थितीत धुळे येथे बैठक आयोजित करण्यात आली आहे. त्यामुळे अक्कलकुवा-अक्रानी मतदारसंघासाठी शिंदे शिवसेना आणि राष्ट्रवादीमध्ये रस्सीखेच पाहायला मिळणार आहे. महायुतीतील अनेक जागांवर दावे प्रतिदावे देखील करण्यात येत आहेत.