Nagpur : पती-पत्नी मॉर्निंग वॉकला गेले अन् तोल जाऊन नदीत पडले, पत्नी वाचली तर पतीचा मृत्यू

नेमकं काय घडलं?

प्रशांत शेषराव पोटोडे (वय 40) असे मृतकाचे नाव आहे तर संध्या प्रशांत पोटोडे ( वय 34) असे मृतकाच्या पत्नीचे नाव आहे. हे बीना भानेगाव येथील रहिवाशी आहेत. हे दोघेही भानेगाव ते पारशिवनीमार्गे कन्हान नदीच्या पुलावर मॉर्निंग वॉकसाठी गेले होते. मॉर्निंग वॉकनंतर दोघेही पुलाच्या काठावर बसले होते. अचानक प्रशांत पटोडे यांना चक्कर आली. आणि त्यांचा तोल जाऊ लागला त्यानंतर प्रशांत यांच्या पत्नीने त्यांचा हात पकडून ओढण्याचा प्रयत्न केला. मात्र यात त्यांच्या पत्नीचाही तोल गेला आणि ते दोघेही पुलाखाली पडले. त्यानंतर दोघेही पाण्यात वाहू लागले. या घटनेत पती पाण्यात वाहून गेला तर पत्नी काही अंतरावर पुलाजवळ वाहून गेली आणि किनाऱ्यावर अडकली. किनाऱ्यावर असताना तिथे असलेले वेकोली कर्मचाऱ्यांना हा प्रकार कळाला. त्यानंतर कर्मचाऱ्यांनी पाण्यात उडी घेऊन संध्या यांना तात्काळ सुखरूप बाहेर काढले. जवळच्या प्राथमिक आरोग्य केंद्रात दाखल करण्यात आले.

आत्महत्येचा संशय –

घडलेल्या घटनेची माहिती खापरखेडा पोलिसांना मिळताच पोलीस पथक घटनास्थळी पोहोचले आहे. आणि डायव्हिंग टीमला पाचारण करत मृतदेहाचा शोध सुरू झाला. मात्र प्रशांत यांचा मृतदेह अद्याप सापडलेला नाही. डायव्हिंग टीम नदीत उतरून त्यांच्या मृतदेहाचा शोध घेत आहे.

दरम्यान, संध्या यांनी पोलिसांना दिलेल्या माहितीनुसार त्यांच्या पतीला चक्कर आल्याने ही घटना घडली. प्रशांत आजारी असल्याने अनेक दिवसांपासून कामावर जात नव्हता, तसेच प्रशांत आणि संध्या एवढ्या लांब कधीच फिरायला जात नव्हते. तर घटनेच्या एक दिवसाआधी शाळेत पेपर असतानाही त्यांनी आपल्या मुलाला नातेवाईकांकडे का पाठवले ? त्यामुळे याबाबत शंका उपस्थित केल्या जात आहे.