वेगळा विदर्भ होईपर्यंत लग्न करणार नव्हतात ना? संजय राऊतांचे फडणवीसांना टोले

संजय राऊत काय म्हणाले?

शेवटचे पेशवे बाळाजी विश्वनाथ यांनी पुण्यात शिवाजी महाराज यांचे मराठा साम्राज्य लयास नेले. पुण्याच्या शनिवार वाड्यावर ब्रिटिशांचा युनियन जॅक फडकवला. पेशवाईचे उत्तराधिकारी देवेंद्र फडणवीस आहेत. त्याशिवाय अशी भाषा त्यांनी केली नसती. कोणता इतिहास देवेंद्र फडणवीस आम्हाला सांगत आहेत? छत्रपती शिवाजी महाराज यांच्या सन्मानासाठी आम्ही लढत आहोत. आम्ही संघर्ष करत आहोत आणि तुम्ही आमच्यावरती गुन्हे दाखल करता? आम्हाला छत्रपती शिवाजी महाराज की जय ही घोषणा देण्यास विरोध करता. मालवणमध्ये शिवाजी महाराजांचा पुतळा तोडला हे तुमचे पाप आहे. तुम्हीच तोडला, तुटला नाही तोडलाच. त्यात कोट्यवधींचा घोटाळा करणारे आजही मोकाट आहेत तुम्ही त्यांना अटक करू शकत नाही. कारण ते तुमच्या पेशवाईचे शिलेदार आहेत, असं संजय राऊत म्हणाले.
देवेंद्र फडणवीसांना मोठा धक्का, समर्थक भाजप सोडण्याच्या तयारीत, काँग्रेस प्रवेशाचे संकेत

पोलिसांच्या अंगावर धावून जाणारे गुंड

आदित्य ठाकरे यांचे नेतृत्वाखाली जयंत पाटलांसोबत अन्य लोक होते. तेव्हा मालवणच्या किल्ल्यावर जाण्यापासून रोखण्याचं काम हे भाजपचे गुंड करत होते. तुम्ही त्यांचे समर्थक आहात. पोलिसांच्या अंगावर धावून जाणारे तुमचे गुंड. आम्हाला शिवाजी महाराजांचा इतिहास शिकवणार आहात का? तुम्हाला शिवाजी महाराजांचं नाव घेण्याचा अधिकार नाही. हा छत्रपती शिवाजी महाराजांचा अखंड महाराष्ट्र तोडून वेगळा विदर्भ करणारे तुम्ही आहात. हे तुमच्या मनामध्ये आहे की नाही? शिवाजी महाराजांचा महाराष्ट्र तोडून वेगळा विदर्भ करत नाही, तोपर्यंत लग्न करणार नाही, ही घोषणा कोणाची होती? तुम्ही शिवाजी महाराजांचे सच्चे भक्त असाल तर बेळगाव कारवार यावर तुमची काय भूमिका आहे, हे स्पष्ट करा, असं राऊत म्हणाले.

तुम्ही कधी इतिहास शिकला?

शिवाजी महाराजांचं राज्य मावळ्यांचं राज्य होतं. तुम्ही हे खतम करायला निघाले आहात. छत्रपती शिवाजी महाराजांनी सुरत लुटली नाही हा तुमचा नवीन चिंतनाचा विषय समोर आणला आहे. तुम्हाला इतिहास काय माहिती? तुम्ही कधी इतिहास शिकला? म्हणजे तुम्ही शत्रू आहात. छत्रपती शिवाजी महाराजांनी सुरत एकदा नाही दोनदा लुटली. शिवाजी महाराजांनी सुरत राष्ट्रीय सुरक्षिततेसाठी लुटली. ईस्ट इंडिया कंपनीला खंडणी देत होता, ते प्रोटेक्शन मनी देत होते. हा राष्ट्रद्रोह आहे. त्यामुळेच त्यांनी ठरवलं ईस्ट इंडिया कंपनीला मिळणारी खंडणी बंद करायची आहे, तर सुरत लुटावी लागेल. या व्यापाऱ्यांना धडा शिकवावे लागेल, हा इतिहास देवेंद्र फडणवीस यांनी काळजीपूर्वक वाचावा. नाहीतर आम्ही त्यांना इतिहासाचा मास्टर पाठवू, असा टोलाही संजय राऊत यांनी हाणला.

कोश्यारींची बाजू का घेतली?

भारतीय जनता पक्षातील प्रत्येकाने शिवाजी महाराजांचा अपमान केला आहे. कोश्यारी काय बोलले महाराजांबद्दल. तुम्ही महाराजांची बाजू नाही घेतली, म्हणजे तुम्ही कोश्यारींची बाजू घेतली. दीपक केसरकर काय म्हणले महाराजांबद्दल. तुम्ही महाराजांची बाजू नाही घेतली, केसरकर यांची बाजू घेतली. त्रिवेदी काय म्हटले महाराजांबद्दल? तुम्ही त्यांची बाजू घेतली, महाराजांची नाही घेतली. हे तुमचं शिवाजी प्रेम? असा सवाल संजय राऊत यांनी उपस्थित केला.