Ladki Bahin Yojana: बँकेने लाभार्थ्यांचे पैसे कापले, ‘लाडक्या बहिणी’साठी महिला व बालविकास मंत्रालयाचा मोठा निर्णय

राज्य सरकारने यंदाच्या अर्थसंकल्पात ‘मुख्यमंत्री लाडकी बहीण योजना’ जाहीर केली आहे. आगामी विधानसभा निवडणुका लक्षात घेता या योजनेला महत्त्व प्राप्त झाले आहे. आधीच यावरून सत्ताधारी आणि विरोधकांमध्ये आरोप-प्रत्यारोपांची मालिका सुरू असतानाच, महायुतीतील घटक पक्षांमध्येही श्रेयवाद रंगला आहे. प्राप्त माहितीनुसार योजनेअंतर्गत आतापर्यंत जुलै आणि ऑगस्ट या दोन टप्प्यांत एक कोटी ५९ लाख लाभार्थ्यांना चार हजार ७८७ कोटींचा लाभ देण्यात आला आहे. लाभार्थ्यांच्या खात्यात थेट तीन हजार रुपयांची रक्कम जमा केली जाणार आहे. योजनेसाठी ३० सप्टेंबर २०२४पर्यंत अर्ज करता येणार आहे. मात्र अनेक लाभार्थ्यांच्या खात्यात रक्कम जमा केल्यानंतर, पैसे कापण्यात आल्याच्या तक्रारी समोर आल्या आहेत. अनेक महिलांनी खात्यात अनिवार्य रक्कम ठेवलेली नसल्याने, ही रक्कम कापल्याचे समोर आले आहे. यासंदर्भात राज्य सरकारकडे तक्रारींचा पाऊस पडला आहे. गुरुवारी मंत्रिमंडळ बैठकीत यासंदर्भातही चर्चा झाल्याचे कळते.

महिला व बालविकास विभागानेही याची गंभीर दखल घेतल्याची समजते. यासंदर्भात विशेष बैठक काही दिवसांपूर्वीच पार पडल्याची माहिती मंत्रालयातील सूत्रांनी दिली. या बैठकीला महिला व बालविकास विभागाच्या प्रमुख अधिकाऱ्यांसह इतर अनेक अधिकारी उपस्थित होते. लवकरच राज्यातील सर्व बँकाशी याबाबत पत्रव्यवहार करण्याचा निर्णय बैठकीत घेण्यात आला. लाभार्थी महिलांचे पैसे कापू नयेत, याबाबत बँकांना सूचना करण्यात येणार आहेत. यासंदर्भात राज्याच्या महिला व बालविकास मंत्री आदिती तटकरे यांच्याशी संपर्क साधला असता, त्यांनीही या वृत्ताला दुजोरा दिला.

अर्ज अंगणवाडी सेविकांकडेच

राज्य सरकारने या योजनेचे अर्ज स्वीकारण्यासाठी राज्यातील अंगणवाडी सेविकांशिवाय आशा सेविका, सेतू सुविधा केंद्र, ग्रामसेवक यांसारख्या अनेकांना मान्यता दिली होती. मात्र योजनेसाठी आता मर्यादित संख्येत अर्ज येत असल्याने अंगणवाडी सेविकांव्यतिरिक्त इतर सर्व प्राधिकृत व्यक्तींना दिलेले अर्ज स्वीकारण्याचे अधिकार रद्द करण्याचा निर्णय गुरुवारी मंत्रिमंडळाने घेतल्याचे कळते.