Nanded News: दहीहंडी कार्यक्रमात दोघांमध्ये वाद, दुसऱ्या दिवशी वाद मिटवण्यासाठी आले, पण भलतंच घडलं

नेमकं काय घडलं?

गुरुवारी रात्री कृष्णा मुळे या युवकाचे दहीहंडी मध्ये नाचताना धक्का लागल्याने अंकुश इंगोले सोबत भांडण झाले होते. इतर तरुणांनी वाद मिटवले. दुसऱ्या दिवशी म्हणजेच शुक्रवारी दुपारी हा वाद मिटवण्यासाठी कृष्णा मुळेसोबत त्याचा मित्र वैभव दुधाटे आला तर आरोपी अंकुश इंगोलेसोबत त्याचा मित्र योगेश चौधरी आला. राज कॉर्नर येथील एका चहाच्या हॉटेलमध्ये चौघेजण बसले होते. मात्र त्यांच्यात पुन्हा वाद झाला. हॉटेलमध्ये भांडणाचं रुपांतर हाणामारीत झालं. त्यानंतर हॉटेल बाहेर येऊन कृष्णा मुळे आणि वैभव दुधाटे यांनी अंकुशला मारहाण केली. यावेळी रागाच्या भरात आरोपीने हॉटेलमधील चाकू घेऊन वैभवच्या छातीत वार केले तसेच कृष्णाला देखील जखमी केले. रक्तभंबाळ झालेल्या वैभव दुधाटे याचा रुग्णालयात नेण्यापूर्वीच मृत्यू झाला.

भरदिवसा मुख्य रस्त्यावर घडलेल्या या घटनेनं मात्र दहशत निर्माण झाली होती. घटनेची माहिती मिळताच पोलीस अधीक्षक अबिनाश कुमार, सहाय्यक पोलीस अधिक्षक एस. कार्तिका यांनी घटनास्थळी भेट दिली. आरोपी अंकुश इंगोले याला पोलिसांनी अटक केली आहे. या प्रकरणी भाग्यनगर पोलीस ठाण्यात रात्री उशिरा खुनाचा गुन्हा दाखल करण्यात आला आहे. अधिक तपास पोलीस करीत आहेत. क्षुल्लक कारणावरून घडलेल्या खुनाच्या घटनेने शहरात खळबळ उडाली आहे.