अमित ठाकरेंना ‘बाय’ नाही; जागावाटपाआधीच मातोश्रीकडून उमेदवार ठरला; माहीममध्ये तिरंगी सामना

माहीममधून अमित ठाकरेंना उमेदवारी मिळणार अशी चर्चा गेल्या अनेक दिवसांपासून सुरु होती. काल मनसेनं रात्री उशिरा उमेदवारांची यादी जाहीर केली. त्यात अमित ठाकरेंच्या नावाचा समावेश आहे. अमित ठाकरे रिंगणात असल्यास ठाकरेंची शिवसेना उमेदवार देणार नाही. २०१९ मध्ये आदित्य ठाकरे वरळीतून निवडणूक लढले. त्यावेळी मनसेनं तिथे उमेदवार दिला नव्हता. त्याची परतफेड उद्धव ठाकरे अमित यांच्याविरोधात उमेदवार न देता करतील, असं बोललं जात होतं. पण तसं काही घडलेलं नाही.
NCP Candidate List: ताटातलं वाटीत आलं अन् आमदाराचं तिकीट गेलं; दादांचा निष्ठावंताला धक्का, पटेलांचा पुन्हा डाव
उद्धव ठाकरेंनी माहीममधून महेश सावंत यांच्या नावाची घोषणा केली आहे. त्यामुळे माहीममध्ये तिरंगी लढत होणार आहे. ठाकरेसेनेचे महेश सावंत विरुद्ध मनसेचे अमित ठाकरे विरुद्ध शिंदेसेनेचे सदा सरवणकर अशी तिरंगी लढत माहीममध्ये होणार आहे. माहीममधून महेश सावंत विधानसभा निवडणूक लढतील, अशी घोषणा उद्धव ठाकरेंनी मातोश्रीवर झालेल्या बैठकीत पदाधिकाऱ्यांसमोर केली. एकदिलानं काम करा आणि दादरमध्ये भगवा फडकवा, अशा सूचना उद्धव ठाकरेंनी पदाधिकाऱ्यांना दिल्या आहेत.

राज ठाकरेंच्या मनसेनं लोकसभा निवडणुकीत मनसेला बिनशर्त पाठिंबा दिला होता. राज यांनी महायुतीच्या उमेदवारांसाठी प्रचारसभा घेतल्या. त्यातील एक प्रचारसभा त्यांनी मुख्यमंत्री एकनाथ शिंदेंचे पुत्र आणि कल्याणचे खासदार श्रीकांत शिंदे यांच्यासाठी घेतली. कल्याण ग्रामीणचे मनसेचे आमदार राजू पाटील यांनी शिंदेंचा प्रचार केला होता. त्यामुळे एकनाथ शिंदेंकडून माहीममध्ये उमेदवार दिला जाणार नाही. त्यांच्याकडून अमित ठाकरेंना पाठिंबा दिला जाईल, अशीही चर्चा होती. पण शिंदेंनी विद्यमान आमदार सदा सरवणकर यांना उमेदवारी दिलेली आहे.