महायुतीमध्ये बिघाडी, पाथरी मतदारसंघ अजित पवार गटाला; शिंदेंचा शिलेदार आता अपक्ष लढणार

पाथरी विधानसभा मतदारसंघ

पाथरी विधानसभा मतदारसंघ हा पूर्वापार भाजपचा मतदार संघ आहे. २०१४ मध्ये झालेल्या विधानसभा निवडणुकीत भाजपकडून मोहन फड यांनी पाथरी विधानसभा मतदारसंघातून विजय मिळवला होता. त्यानंतर २०१९ च्या विधानसभा निवडणुकीत भाजपच्या मोहन फड यांचा काँग्रेसचे सुरेश वरपुडकर यांनी पराभव केला. २०१४ मध्ये विजय झालेल्या मोहन फड यांना आज २०२४ च्या विधानसभा निवडणुकीत उमेदवारी मिळणार होती, पण अचानक त्यांची प्रकृती खालवल्यामुळे पाथरी विधानसभा मतदारसंघांमध्ये कोण उमेदवार असेल याची चर्चा जोरदार रंगू लागली होती.

पाथरी मतदारसंघात शिंदेंच्या शिवसेनेकडून सईद खान यांची उमेदवारीची मागणी होती

मुख्यमंत्री एकनाथ शिंदे यांच्या शिवसेनेच्यावतीने मागील दोन वर्षापासून सईद खान हे पाथरी विधानसभा मतदारसंघात कार्यरत आहेत. सईद खान यांनी मागील दोन वर्षात मोठ्या प्रमाणावर निधी आणल्याने पाथरी विधानसभा मतदारसंघाचा बहुतांश विकास केला आहे आणि त्या बळावरच सईद खान यांनी मुख्यमंत्री एकनाथ शिंदेंकडे पाथरी विधानसभा मतदारसंघ शिवसेनेला सोडून घ्यावा आणि उमेदवारी मला द्यावी अशी मागणी लावून धरली होती.
लॉरेन्स बिश्नोईची राजकारणात एन्ट्री? या पक्षाकडून महाराष्ट्रात विधानसभा लढण्याची ऑफर

पाथरी मतदारसंघ अजितदादा गटाला, सईद खान यांचा अपक्ष लढण्याचा निर्णय

मुख्यमंत्री एकनाथ शिंदे यांनी देखील याविषयी ग्रीन सिग्नल दिला होता आणि तशा पद्धतीची कार्यवाही चालू होती. पण आज अचानक पाथरी विधानसभा मतदारसंघ राष्ट्रवादी काँग्रेस अजित पवार यांना सुटल्यामुळे मात्र सईद खान यांचा हिरमोड झाला. सईद खान यांनी आज कार्यकर्त्यांचा मेळावा घेतला आणि पक्षाच्या या निर्णयावर नाराजी व्यक्त करत अपक्ष निवडणूक लढण्याची घोषणा देखील केली.
वडील जेलमध्ये गेले, अंडरवर्ल्ड डॉन दाऊद इब्राहिमशी संबंध? अणुशक्तीनगरमधून मिळाले तिकीट मिळालेल्या सना मलिक कोण?
लोकसभा निवडणुकीमध्ये राष्ट्रवादी काँग्रेसकडून आमदार राजेश विटेकर लढण्यात इच्छुक होते, पण महायुतीमध्ये लोकसभेची जागा राष्ट्रीय समाज पक्षाला सुटल्यामुळे राजेश विटेकर यांना माघार घ्यावी लागली होती. त्याच्या बदल्यात राजेश विटेकर यांना विधान परिषदेची आमदारकी देखील महायुतीने बहाल केली. पण आता विधानसभा निवडणुकीत आमदार राजेश विटेकर यांच्या आई निर्मलाताई विटेकर यांना उमेदवारी जाहीर करण्यात आली. निर्मलाताई विटेकर यांनी यापूर्वी देखील जिल्हा परिषदेच्या महिला आणि बालविकास सभापती तसंच परभणी जिल्हा परिषदेच्या अध्यक्षा म्हणून काम पाहिले आहे. त्यांना उमेदवारी मिळाल्याने महायुतीमध्ये मात्र मिठाचा खडा पडल्याचे दिसून येत आहे.

कोण आहेत सईद खान

सईद खान हे मुख्यमंत्री एकनाथ शिंदे यांचे अत्यंत विश्वासू कार्यकर्ते आहेत. सईद खान यांच्याकडे शिवसेना अल्पसंख्यांक विभागाचे प्रदेशाध्यक्ष पद आहे. शिवसेनेचे विभाजन झाल्यानंतर मागील दोन वर्षापासून सईद खान यांनी परभणी जिल्ह्याच्या संघटनात्मक बाबींकडे गांभीर्याने लक्ष घातले. त्यातल्या त्यात पाथरी विधानसभा मतदारसंघातील बहुतांश प्रश्न मुख्यमंत्री एकनाथ शिंदे यांच्या नेतृत्वात सोडवण्याचा प्रयत्न केला. पाथरी विधानसभा मतदारसंघातील साई जन्मभूमीसाठी शंभर कोटीचा विकास आराखडा मंजूर करण्यात आला. त्याचबरोबर अन्य शेकडो कोटींची विकास कामे खेचून आणल्याचे सईद खान सांगत आहेत.