कारंजा मतदारसंघात मोठे फेरबदल, सई डहाकेंच्या भाजप प्रवेशाने पाटणी कुटुंबाला धक्का

सई डहाके यांच्या भाजप पक्ष प्रवेशानंतर कारंजाचे भाजपचे दिवंगत आमदार राजेंद्र पाटणी यांचे पुत्र ज्ञायक पाटणी हे राष्ट्रवादी शरद पवार पक्षात प्रवेश करणार असल्याची सूत्रांची माहिती आहे. ज्ञायक पाटणी यांचा शरद पवार यांच्या पक्षात प्रवेश झाल्यास कारंजा विधानसभा मतदारसंघात भाजपकडून सई डहाके आणि राष्ट्रवादी काँग्रेस शरद पवार पक्षाकडून ज्ञायक पाटणी यांची उमेदवारी निश्चित होऊ शकते. त्यामुळे या मतदारसंघातील राजकारण तब्बल ३६० अंशाने बदलल्याचे दिसून येत आहे.
Ashish Shelar : उद्धवजींना नातं वाटत नसेल, पण आमच्या घरातला अमित पहिली निवडणूक लढतोय, सरवणकरांनी माघार घ्यावी, शेलारांचं मत
कारंजा मतदारसंघात भाजपचे राजेंद्र पाटणी हे २०१४ आणि २०१९ मध्ये निवडून आले होते. त्यांचे दिनांक २३ फेब्रुवारी २०२४ला निधन झाले. त्यांच्या जागेवर त्यांचा मुलगा ज्ञायक पाटणी याला उमेदवारी मिळेल अशी मतदारसंघात चर्चा होती तर उपमुख्यमंत्री देवेंद्र फडणवीस यांनी देखील निवडणुकीच्या तयारीला लागण्याचे आदेश दिले होते, असे पाटणी यांचे समर्थक सांगतात. तर राजेंद्र पाटणी यांच्या निधनानंतर त्याला सहानुभूती मिळेल असेही बोलले जात होते. त्याअनुषंगाने ज्ञायक पाटणी यांनी मतदारसंघ पिंजून काढला आहे. पाटणी यांच्या शब्दावर सरकारने या मतदारसंघात मोठा निधीही दिला आहे. त्यामूळे ज्ञायक पाटणी यांची उमेदवारी पक्की मानली जात होती. मात्र मध्येच ज्ञायक पाटणी यांना पक्षाने थांबण्याचा सल्ला दिला.

भाजपच्या संबंधित सूत्रांनी दिलेल्या माहितीनुसार भाजपने केलेल्या अंतर्गत सर्व्हे मध्ये ज्ञायक पाटणी यांचा विजय कठीण असल्याचे चित्र समोर आले होते. त्यामुळे त्यांच्या जागेवर राष्ट्रवादी काँग्रेस अजित पवार पक्षाच्या सई डहाके यांना पक्षात घेऊन भाजपने नवी खेळी खेळल्याचे पाहायला मिळत आहे. मात्र भाजपची ही खेळी भाजप कार्यकर्ते आणि मतदारांच्या पचनी पडेल का हे पाहणे देखील महत्त्वाचे असणार आहे.