अखेर चंद्रपुरचा ‘वाघ’ जेरबंद, किशोर जोरगेवारांचा उद्या भाजपप्रवेश, मुनगंटीवारांचीही असणार उपस्थिती

चंद्रपूर जिल्ह्यात सहा विधानसभा मतदारसंघ आहेत. त्यातीलच महत्वाचा मतदारसंघ चंद्रपूर आहे. हा मतदारसंघ कधीकाळी काँग्रेसचा गड राहिलेला आहे. परंतु भाजपने काँग्रेसचा गड भेदला आणि तब्बल पंचवीस वर्ष भाजपने येथे सत्ता राखली. २०१९च्या विधानसभेच्या निवडणुकीत अपक्ष आमदार किशोर जोरगेवार यांनी भाजपाचा ताब्यात असलेला गड काबीज केला. तर यंदा भाजपच्या तिकिटावर निवडणूक लढण्याचे जोरगेवार यांनी जाहीर केले होते. तशी तयारी देखील त्यांनी सुरु केली. लोकसभेच्या निवडणुकीत शेवटच्या क्षणी त्यांनी भाजपचे काम केले. त्यामुळे भाजपमध्ये जोरगेवार प्रवेश करतील अशा चर्चा रंगल्या होत्या. मात्र भाजपच्या स्थानिक कार्यकर्त्यांनी टोकाचा विरोध केला. हा विरोध बघता जोरगेवार यांनी तुतारी हाती घेण्याचे ठरविले. इथेही काँग्रेसने विरोध केला. त्यामुळे त्यांच्यासाठी तुतारी हुकली. शेवटी जोरगेवार यांनी भाजपकडे आपला मोर्चा वळविला आहे.
BJP Second List: भाजपची दुसरी यादी जाहीर, २२ उमेदवारांच्या नावाची घोषणा; पाहा कोणाला संधी मिळाली
कार्यकर्त्यांची नाराजी पुढे करीत सुधीर मुनगंटीवार यांनी जोरगेवारांसाठी ‘नको’चा सुर लावला होता. त्यासाठी ते थेट दिल्लीला गेले. मात्र मुनगंटीवारांची ताकद कमी पडल्याचे दिसत आहे. जोरगेवार यांना भाजपचे दार खुले झाले आहे. उद्या ते भाजपमध्ये प्रवेश करणार आहेत. विशेष म्हणजे हा पक्षप्रवेश मुनगंटीवार यांच्या उपस्थितीतच पार पडणार आहे.

भाजप कार्यकर्त्यांची नाराजी कशी दूर करणार?

भाजपच्या स्थानिक कार्यकर्त्यांनी अगदी सुरुवातीपासूनच जोरगेवार यांच्या पक्षप्रवेशाला विरोध केला होता. पाच वर्षांत अनेक पक्ष बदलणाऱ्याला उमेदवारी नको असा आग्रह मुनगंटीवार यांनीही धरला. आता भाजपच्या स्थानिक कार्यकर्त्यांची नाराजी दूर करण्याचे मोठे आव्हान जोरगेवार यांच्यापुढे असणार आहे. यात त्यांना यश मिळाले तर २०१९ प्रमाणे त्यांचा विजय निश्चित मानला जात आहे.