काँग्रेसची डोकेदुखी वाढली, उमेदवारी जाहीर, पण काँग्रेस नेता म्हणतो, मला इथून नको… उबाठा जागाबदल करणार?

काँग्रेसने जाहीर केलेल्या तिसऱ्या यादीमध्ये काँग्रेस पक्षाचे प्रवक्ते सचिन सावंत यांना अंधेरी पश्चिममधून उमेदवारी दिली गेली आहे. मात्र उमेदवारी माघारी घ्यावी अशी मागणी केली सावंत यांनी केलीये त्यांनी उमेदवारी मागे घेण्याचं कारणही सांगितलं आहे. सचिन सावंत यांना वांद्रे पूर्व या विधानसभा मतदारसंघातून निवडणूक लढवायची आहे. मात्र मविआमध्ये ती जागा ठाकरे गटाला देण्यात आलीये. त्यामुळे आता काँग्रेसचे पक्षश्रेष्ठी यावर काय निर्णय घेतात हे पाहणं महत्त्वाचं ठरणार आहे.

सचिन सावंत काय म्हणाले?

मी वांद्रे पूर्व विधानसभा मतदारसंघातून पक्षाकडे उमेदवारी मागितली होती. तीथेच लढावे अशी माझी इच्छा होती. परंतु तो मतदारसंघ शिवसेना उबाठा पक्षाकडे गेला आहे. मी अंधेरी पश्चिम मतदारसंघातून उमेदवारी मागितली नव्हती. तरी पक्षश्रेष्ठींनी माझ्यावर जो विश्वास दाखवला त्याबद्दल मनापासून धन्यवाद. परंतु मी महाराष्ट्र काँग्रेस पक्षाचे प्रभारी रमेश चेन्नितला यांना पक्षाने निर्णय बदलावा याकरिता विनंती केली आहे. मी पक्षाचा निष्ठावंत कार्यकर्ता आहे. त्यामुळे पक्षश्रेष्ठी माझ्या विनंतीचा सहानुभूतीपूर्वक विचार करतील ही आशा बाळगतो, असं सचिन सावंत यांनी म्हटलं आहे.

दरम्यान, वांद्रे पूर्व येथे महायुतीमधील राष्ट्रवादी काँग्रेसकडून बाबा सिद्दिकी यांना तिकिट देण्यात आले आहे. तर ठाकरे गटाने या मतदारसंघात वरूण सरदेसाई यांना उमेदवारी दिली आहे. मात्र आता सचिन सावंत यांनी वांद्रे पूर्व येथून तिकिट मागितलं असून तिथून लढण्यासाठी इच्छुक आहेत. त्यामुळे ठाकरे आता आफला उमेदवार बदलणारी की आपल्या निर्णयावर आडून राहणार याकडे सर्वांचं लक्ष लागलं आहे.