वाघाचे ‘लोटांगण’! ‘पक्ष बदलणारे’ म्हणून आधी डरकाळी फोडली; मात्र जोरगेवारांच्या प्रवेशानंतर नमती बाजू घेतली

चंद्रपूरचे अपक्ष आमदार किशोर जोरगेवार यांनी आज भाजपमध्ये अधिकृतरित्या प्रवेश केला आहे. भाजपचे ज्येष्ठ नेते सुधीर मुनगंटीवार यांच्या उपस्थितीत हा पक्षप्रवेश सोहळा पार पडला. यामुळे आता जोरगेवार यांना चंद्रपुरातून भाजपची उमेदवारी निश्चित झाल्याचे मानले जात आहे. मागील काही दिवसांपासून जोरगेवार प्रमुख राजकीय पक्षांच्या उमेदवारीसाठी प्रयत्न करीत होते. शरद पवार यांच्या भेटीला ते गेले होते. पण तिथे त्यांना प्रतिसाद न मिळाल्याने त्यांनी भाजपची वाट धरली. यात भाजप नेते आणि माजी केंद्रीय मंत्री हंसराज अहिर यांनी त्यांना भक्कम पाठबळ दिले. त्यामुळे मुनगंटीवार यांची इच्छा नसतानाही जोरगेवार यांना पक्षात प्रवेश देण्याचे आदेश पक्षाने दिले आणि त्या आदेशावर मुनगंटीवार यांनी आज अंमल केला. यावेळी हंसराज अहिर हेही काही वेळाने उपस्थित झाले.

किशोर जोरगेवार यांच्यासह महिला काँग्रेसच्या माजी जिल्हाध्यक्ष नम्रता ठेमस्कर आणि इतर अनेकांनी प्रवेश घेतला. प्रारंभी मुनगंटीवार यांनी जोरगेवार यांच्या नावाला मोठा विरोध केला, पण पक्षाच्या निर्णयामुळे त्यांना माघार घ्यावी लागल्याचे दिसते. यामुळे मुनगंटीवार समर्थकांमध्ये मोठा असंतोष पसरला आहे. हा असंतोष कसा थोपवण्यात नेत्यांना यश मिळेल का, असा प्रश्न उपस्थित केला जात आहे.

‘माझी पहिली पसंती भाजप’

आमदार किशोर जोरगेवार यांची अखेर भटकंती आज थांबली आहे. त्यांच्या भटकंतीवर राजकीय वर्तुळात मोठी चर्चा रंगली होती. पक्षप्रवेशानंतर जोरगेवार म्हणाले माझी पहिली पसंती भारतीय जनता पार्टी होती. मी भाजपमध्ये अनेक वर्ष काम केलं आहे. मात्र राजकीय घडामोडीमुळे मला बाहेर जावे लागले. भाजपने माझ्यासोबत आज न्याय केला आहे. आजचा दिवस माझ्यासाठी फार महत्वाचा आहे.