Sada Sarvankar: अमित ठाकरेंसाठी माघार घ्या, शिंदेंनी समजवलं, सरवणकरांचा एकच प्रश्न अन् मुख्यमंत्री निरुत्तर

By tejpolicetimes On Oct 28, 2024

Sada Sarvankar Vs Amit Thackeray: अमित ठाकरेंसाठी उमेदवारी मागे घ्या, अशी विनंती एकनाथ शिंदे यांनी सदा सरवणकर यांच्याकडे केली. पण, सरवणकर यांनी एक प्रश्न विचारला आणि मुख्यमंत्री त्यावर काहीच बोलू शकले नाहीत.

हायलाइट्स:
माहीममध्ये अमित ठाकरे विरुद्ध सदा सरवणकर
उमेदवारी मागे घ्या, शिंदेंची सरवणकरांना विनंती
सरवणकरांच्या प्रश्नाने एकनाथ शिंदे निरुत्तरीत

मुंबई: विधानसभा निवडणुकीसाठी उमेदवारी अर्ज दाखल करण्यासाठी आता फक्त एक दिवस शिल्लक राहिला आहे. त्यामुळे आज बऱ्याच बड्या नेत्यांनी उमेदवारी अर्ज दाखल केला. त्यातच यंदाच्या विधानसभा निवडणुकीत सर्वात चर्चेत असणाऱ्या मुंबईतील माहीम विधानसभा मतदारसंघातून पहिल्यांदाच मनसे प्रमुख राज ठाकरेंचे चिरंजीव अमित ठाकरे निवडणूक लढणार आहेत. अमित ठाकरेंची उमेदवारी जाहीर झाल्यापासूनच हा मतदारसंघ चर्चेत आहे. या मतदारसंघातून अमित ठाकरेंविरोधात शिंदे गटाने विद्यमान आमदार सदा सरवणकर यांना उमेदवारी जाहीर केली आहे. तर ठाकरे गटाने महेश सावंत यांना निवडणुकीच्या रिंगणात उतरवलं आहे.सुरुवातीला या मतदारसंघात उद्धव ठाकरे उमेदवार देणार नसल्याचं बोललं जात होतं. पण, ठाकरेंनी उमेदवार दिला. तर, स्वत: राज ठाकरेंचा मुलगा उमेदवार असल्याने महायुतीची गोची झाली. अमित ठाकरेंसाठी सदा सरवणकर यांनी माघार घ्यावी असंही घटकपक्षातून बोललं जात होतं. तर काही नेत्यांनी अमित ठाकरेंना उघडपणे पाठिंबाही दर्शवला होता. पण, सदा सरवणकर हे निवडणुकीतून माघार घेण्यास तयार नसल्याने पेच आणखी वाढला.

Amit Thackeray: ते पुन्हा एकत्र यावे असं वाटत नाही, अमित ठाकरेंचं राज आणि उद्धव ठाकरेंबाबत मोठं विधान
या पार्श्वभूमीवर मुख्यमंत्री एकनाथ शिंदे यांनी स्वत: सदा सरवणकर आणि त्यांचे पुत्र समाधान सरवणकर यांची भेट घेतली आणि त्यांची समजूत काढण्याचा प्रयत्न केला. पण, यावेळी सरवणकरांनी मुख्यमंत्र्यासमोर असा प्रश्न उपस्थित केला की त्याचं उत्तर शिंदे देऊच शकले नाही.

या बैठकीत सदा सरवणकर यांनी शिंदेंना विचारलं की, ‘मी गेले ३० वर्ष या विभागाचं लोकप्रतिनिधित्व करत आहे. मुख्यमंत्रीसाहेब तुम्हीच सांगा, निवडणूक लढवली तर मी जिंकेन की नाही?’, सरवणकरांच्या या प्रश्नावर शिंदे काहीच उत्तर देऊ शकले नाही.

Sada Sarvankar: अमित ठाकरेंसाठी माघार घ्या, शिंदेंनी समजवलं, सरवणकरांचा एकच प्रश्न अन् मुख्यमंत्री निरुत्तर

राज ठाकरे आणि भाजपमध्ये चांगले संबंध आहेत. लोकसभेतही राज ठाकरेंनी पंतप्रधान मोदींना माझं समर्थन देतो असं म्हणत राज्यातील महायुतीला पाठिंबा दिला होता. त्यामुळे आता त्याची परतफेड भाजपला अमित ठाकरेंविरोधात उमेदवार न देऊन करायची आहे, असं दिसतं. त्यामुळे सदा सरवणकरांनी उमेदवारी मागे घ्यावी यासाठी शिंदेंवर खूप दबाव असल्याचीही चर्चा राजकीय वर्तुळात आहे.

लेखकाबद्दलनुपूर उप्पलनुपूर उप्पल, महाराष्ट्र टाइम्स ऑनलाईन टीममध्ये डिजिटल कंटेंट प्रोड्युसर म्हणून कार्यरत आहेत, याआधी टीव्ही ९ मराठी, साम टीव्ही, इन मराठी वेबसाईटसाठी काम केलंय. डिजिटल पत्रकारिता क्षेत्रात ७ वर्षांचा अनुभव. राजकीय, सामाजिक लिखाणाची आवड. गुन्हेगारीसंबंधित, विज्ञानविषयक बातम्यांमध्ये हातखंडा… आणखी वाचा

Source link