खरी शिवसेना कोणाची? येथे मतदार करणार फैसला; बाळासाहेबांना मानणाऱ्या मतदारसंघाच्या लढतीकडे संपूर्ण राज्याचे लक्ष

परभणी जिल्ह्यात निवडणुकांमधून धनुष्यबाण जर नाहीसा झाला तर मोठा धोका निर्माण होऊ शकतो अशी मागणी शिवसैनिकांनी थेट मुख्यमंत्री एकनाथ शिंदे यांच्याकडे केली. लोकसभेला झालेली चूक विधानसभेला मुख्यमंत्री एकनाथ शिंदे यांनी भरून काढली. मुख्यमंत्री एकनाथ शिंदे यांनी परभणी विधानसभेची जागा भाजपकडे असतानाही शिवसैनिकांच्या आग्रहाखतर शिवसेनेला सोडवून घेतली. पण उमेदवार कोण द्यायचा याची चाचपणी सुरू असतानाच २०१४ मध्ये भाजपकडून लढलेल्या आनंद भरोसे यांना शिवसेनेत प्रवेश देऊन त्यांना उमेदवारी बहाल करण्यात आली.
Imtiaz Jaleel : लोकसभेनंतर महाविकास आघाडी मोठ्या भ्रमात, विधानसभेला फटका बसणार; इम्तियाज जलीलांचा टोला
आनंद भरोसे यांचा काल मुंबई येथे खासदार श्रीकांत शिंदे यांच्या उपस्थितीत शिवसेनेमध्ये प्रवेश करून घेण्यात आला. प्रवेश केल्यानंतर त्यांना तात्काळ परभणी विधानसभा मतदारसंघातून शिवसेनेकडून उमेदवारी देखील देण्यात आली. आनंद भरोसे यांनी आज भव्य शक्ती प्रदर्शन करत आपला उमेदवारी अर्ज दाखल केला आहे. त्यामुळे आता परभणीमध्ये शिवसेना उद्धव बाळासाहेब ठाकरे पक्षाकडून असलेले उमेदवार डॉ. राहुल पाटील यांच्या विरोधात शिवसेना मुख्यमंत्री एकनाथ शिंदे यांच्या पक्षाकडून आनंद भरोसे हे निवडणूक लढणार आहेत.

शिवसेना विरुद्ध शिवसेना असा सामना परभणी विधानसभा मतदारसंघात होणार आहे. त्यामुळे या मतदारसंघांमध्ये उद्धव ठाकरे यांच्यासह मुख्यमंत्री एकनाथ शिंदे यांचाही कस लागणार आहे. जनतेच्या दरबारात खरी शिवसेना कोणाची याचा देखील फैसला आता होणार आहे. त्यामुळे दोन्ही शिवसेनेकडून आता मोर्चे बांधणी जोरात होताना दिसत आहे. निवडणूक प्रचाराच्या काळात या मतदारसंघात घमासान होणार हे आता स्पष्ट दिसत आहे. मुख्यमंत्री एकनाथ शिंदे कोणत्याही परिस्थितीमध्ये उद्धव ठाकरे यांचा हा बालेकिल्ला आपल्या बाजूने खेचण्याचा प्रयत्न करणार आहेत. तर उद्धव ठाकरे हे आपल्या शिवसेनेचा बालेकिल्ला शाबूत ठेवण्यासाठी आग्रही राहणार आहेत. मात्र आता परभणी विधानसभा मतदारसंघात खरी शिवसेना कोणाची याचा फैसला जनता मतदानाच्या रूपाने करणार आहे.