राष्ट्रवादीचे जास्त आमदार असताना मुख्यमंत्रीपद घेतलं नाही, आता कसलं घेणार… इस्लामपुरात अजित पवार बरसले

जयंत पाटलांवर टीकास्त्र सोडत अजित पवार पुढे म्हणाले, आम्ही करेक्ट कार्यक्रम करत नाही, करेक्ट कार्यक्रमाने बंधू भगिनींना पैसे मिळणार नाहीत, तरुणांना नोकऱ्या मिळणार नाहीत. करेक्ट कार्यक्रम करणं त्याच्या हातात नाही. जनतेच्या हातात आहे कोणाचा कार्यक्रम करायचं आहे ते.

इस्लापुरात याआधीपासून घड्याळाला मतदान केलंय आता पण घड्याळालाच मतदान करा. परंपरा मोडीत काढायची नाहीये, बाकीचे येतील, जातील, मोडीत काढतील त्यांनाच लखलाभ, असा जयंत पाटील यांना टोला लगावला आहे. मोदींच्या विचारांचं सरकार आलं तर राज्याच्या अर्थकारणाला लाभ होणार आहे, असे आवाहनही अजित पवारांनी केले आहे.

अजित पवारांनी पुढे लाडक्या योजनांचा आधार घेत लाडक्या मतदारांना साद घातली. घड्याळ, कमळ आणि धन्युषबाणासमोरील बटण दाबा योजना चालू, मात्र दुसरं दाबलं की योजना बंद. काय करायचं ते तुम्ही ठरवा, असे अजित पवार म्हणाले. तर ‘शेतकऱ्यांचं बील माफ करायला धाडस लागतं. हे कोणी केलं नाही. यासाठी प्रशासनावर पकड लागते,’ असा टोलाही त्यांनी लगावला.

‘नुकताच झालेल्या सभेतून असं कळालं म्हणे सांगलीला मुख्यमंत्रीपद मिळणार, पण या केवळ थापा आहेत, असा टोलाही अजित पवारांनी जयंच पाटील यांना लगावला आहे. २००४ ला राष्ट्रवादीचे ७१ आणि काँग्रेसचे ६९ आमदार होते तरी आमच्या पक्षाचे प्रमुख नेते जाऊन दिल्लीत म्हणाले आम्हाला मुख्यमंत्रीपद नकोय. जेव्हा जास्त आमदार तेव्हा मुख्यमंत्रीपद घेतलं नाही आणि आता संख्याबळ नसताना मुख्यमंत्री कसलं घेणार,’ अशा शब्दांत अजित पवारांनी मुख्यमंत्रीपदाच्या संभाव्य चर्चेवरुन शरद पवारांना चिमटा काढला आहे.