Maharashtra Election 2024: आशिष शेलार यांची हॅट्रीक की कॉंग्रेस मारणार बाजी; वांद्रे पश्चिम मतदारसंघाची स्थिती काय?

महायुतीमधून ही जागा भाजपच लढवणार असल्याने आशिष शेलार हेच आमदारकी लढवणार, यात आधीपासूनच स्पष्टता होती. त्यामुळे शेलार यांनी अधिकृत घोषणा होण्यापूर्वीच तयारी सुरू केली होती. महाविकास आघाडीकडून काँग्रेसच्या खात्यात ही जागा जाणार असल्याचे निश्चित होते. प्रिया दत्त, सुरेश शेट्टी या विजय मिळवू शकणाऱ्या नावांना डावलून काँग्रेसश्रेष्ठींनी आसिफ झकारिया यांच्या नावावर शिक्कामोर्तब केले. ‘दत्त’ यांच्या नावावर मतदारसंघातील २६ टक्के मुस्लिम, २३ टक्के मराठी, २२ टक्के गुजराती-मारवाडी-ख्रिस्ती आणि अतिश्रीमंत यांच्या मतांची जुळवाजुळव करत काँग्रेसला विजय मिळवणे सहज शक्य झाले असते. मात्र काँग्रेस श्रेष्ठींनी झकारिया यांना पसंती देत पुन्हा त्याच चेहऱ्यांना संधी देणार असल्याचे कृतीतून दाखवून दिले.

महायुतीकडून ‘बटेंगे तो कटंगे’ असे पोस्टर राज्यातील विधानसभा निवडणुकीत झळकण्यास सुरुवात झाली आहे. मात्र हा नारा वांद्रे पश्चिम मतदारसंघात फारसा उपयोगी ठरणारा नाही, याची जाणीव आशिष शेलार यांना आहे. यामुळे दैनंदिन प्रश्नाच्या, समस्यांच्या आणि स्वकार्यशैलीच्या जोरावर मतदारांपर्यंत पोहोचण्याचा शेलार यांचा प्रयत्न आहे. नुकत्याच पार पडलेल्या लोकसभा निवडणुकीत महायुतीचे उमेदवार उज्ज्वल निकम यांना याच मतदारसंघातून साडेतीन हजार मतांची आघाडी मिळाली. मुस्लिम आणि हिंदू मतदार एकत्र आनंदाने नांदत आहेत. यामुळे दोन्ही समाजाचा ताळमेळ हा शेलार यांच्या विजयाचा मार्ग सुकर ठरणारा असू शकेल.

शिवसेना (उद्धव बाळासाहेब ठाकरे), काँग्रेस या दोन्ही पक्षातील शाखा आणि पक्ष कार्यालय यांचा विस्तार लक्षात घेता येथे मेहनत घेऊन विजयासाठी प्रयत्न करणे शक्य होते. मात्र, विजयश्री खेचून आणण्याची क्षमता असलेल्या उमेदवारांना डावलून काँग्रेसने ‘पुन्हा’ दिलेल्या संधीचा निर्णय योग्य की अयोग्य हे निकालच सांगेल.

विशेष म्हणजे, भाजपचे आशिष शेलार विरुद्ध काँग्रेसचे आसिफ झकारिया यांची लढत २०१९मधील विधानसभा निवडणुकीतही झाली होती. यावेळी २६ हजारांहून अधिक मतांनी शेलार यांनी आमदारकी मिळवली होती. २०२४ आमदारकी निवडणुकीत तेच मुद्दे, तेच उमेदवारी चेहरे आणि त्याच समस्या अशी चर्चा मतदारांमध्ये आहे.

समस्यांचे आगार
खार पश्चिमेकडील झोपडपट्टी, खारदांडा हा परिसर सीआरझेडमध्ये येतो. झोपडपट्टी पुनर्विकास योजना राबवायची असल्यास त्यात अनेक निर्बंध आहेत. झोपडपट्टी परिसरातील स्वच्छतेचा प्रश्न, उंचावरील भागातील पाणीटंचाई, वांद्रे रिक्लमेशन, बँड स्टँडच्या परिसरात येणाऱ्या जोडप्यांमुळे बिघडणारी कायदा व सुव्यवस्था, खार परिसरात पालिका रुग्णालयांचा अभाव, वांद्रे मासळी बाजारात कोळी महिलांचे प्रश्न, अतिप्रचंड वाहतूककोंडी अशा अनेक समस्या मतदारसंघात आहेत.

वांद्रे पश्चिम
एकूण मतदार – २,८७,६५७
पुरूष – १,४९,४४३
महिला – १,३८,२०४
तृतीयपंथी – १०