राज्यात कोणाचं सरकार? ‘ते’ १५० जण ठरवणार, दिवाळीत धमाका; मविआ, महायुतीनं घेतला धसका

विधानसभा निवडणुकीसाठी अर्ज करण्याचा कालचा शेवटचा दिवस होता. राज्यातील बंडखोरांची संख्या १५० च्या घरात आहे. हे बंडोबा महायुती आणि महाविकास आघाडीसाठी डोकेदुखी ठरु शकतात. उमेदवारी अर्ज परत घेण्यासाठी ४ नोव्हेंबरपर्यंतची मुदत आहे. याचा अर्थ बंडोबांना थंडोबा करण्यासाठी केवळ ५ दिवसांचा अवधी आहे. या कालावधीत ज्या आघाडीला बंडखोरांची संख्या कमी करता येईल, त्यांच्या विजयाची शक्यता वाढेल.
आवळा देऊन कोहळा काढला! जागा देताना भाजपकडून मित्रपक्षांचा (नंबर)गेम; मोठ्या भावानं डाव टाकला
महाविकास आघाडीतील काँग्रेसनं १०३, ठाकरेसेनेनं ९६, तर शरद पवारांच्या राष्ट्रवादी काँग्रेसनं ८७ जागांवर उमेदवार दिले आहेत. महायुतीनं २८४ जागांवर अर्ज दाखल केले आहेत. महायुतीमधील दोन पक्ष पाच जागांवर आमनेसामने आहेत. दोन जागांवर उमेदवार देण्यात आलेले नाहीत. बोरिवलीत भाजपचे बडे नेते गोपाळ शेट्टींनी बंडखोरी केली आहे. ते दोन टर्मचे माजी खासदार आहेत. नांदगावात शिंदेसेनेच्या उमेदवाराविरोधात मंत्री छगन भुजबळ यांचा पुतण्या समीर भुजबळांनी बंड केलं आहे. इथून एकनाथ शिंदेंनी आमदार सुहास कांदे यांनाच पुन्हा संधी दिली आहे.
ही काही संगीतखुर्ची नाही! भाजपचा निष्ठावंत अपक्ष लढणार; शिंदेसेनेचा ‘इम्पोर्टेड’ नेता रडारवर
महायुती आणि महाविकास आघाडीसमोर बंडोबांना शांत करण्याचं मोठं आव्हान आहे. बंडखोरांची समजूत काढण्याचं आव्हान सत्ताधारी आणि विरोधकांसमोर आहे. ४ नोव्हेंबरपर्यंत अर्ज माघार घेण्याची मुदत आहे. त्यामुळे पुढील पाच दिवस महत्त्वाचे आहेत. राज्यात कोणाची सत्ता येणार या प्रश्नाचं उत्तर येत्या ५ दिवसांत घडणाऱ्या घडामोडींमधून मिळेल. त्यामुळे नाट्यपूर्ण घडामोडी अपेक्षित आहेत.

काही जागांवर आघाडी आणि युतीत मैत्रीपूर्ण लढती होण्याची शक्यता आहे. पण अशा लढती अनेकदा तोट्याच्या ठरतात. दोन्ही उमेदवार ताकदीचे असतील, तर नुकसान होऊ शकतं. मैत्रीपूर्ण लढतीचा फायदा प्रतिस्पर्ध्यांना होतो. त्यामुळे पुढील ५ दिवसांत अशा लढती टाळण्याचं आव्हान दोन्ही बाजूंसमोर असेल. त्यामुळे दिवाळीत किती बंडोबांच्या अपेक्षांचे दिवे विझतात आणि कोणते बंडोबा मैदानात राहून धमाका करतात, त्याची उत्सुकता आहे.