Palghar News: आदिवासींच्या मिठाईची परदेशवारी; खव्वयांची रसना भागवणार मोहाचे लाडू

आदिवासींचा कल्पवृक्ष म्हणजे ‘मोहू’. जंगलात आपोआप उगवणाऱ्या या वृक्षाचे अनेक फायदे आहेत. या मोहाच्या फुलांपासून बनवलेली मिठाई, अनेकविध फुलांपासून तयार झालेले मध, धान्यांची भाकरी वा पापडच नव्हे, तर मधुर चवीचे लाडू खवय्यांची रसना भागवण्यासाठी सज्ज झाले आहेत. आदिवासी बांधवांनी तयार केलेल्या हस्तकृतींसह खास रानाची चव असणाऱ्या खाद्यपदार्थांना नवे रूप देत दीपोत्सवाचे औचित्य साधत आदिवासी मिठाईचा गोडवा जगभर पोहोचवण्यासाठी ‘शबरी नॅचरल्स’चे प्रयत्न सुरू आहेत.

बांबूपासून बनवलेल्या प्रकाशाच्या माळा असोत, थेट शेतातील तांदूळ, विविध फुलांपासून तयार झालेले मध असो वा ज्वारी, नागलीपासून तयार केलेले लाडू, इतकेच नव्हे तर जिभेला अगदी नव्या चवीची अनुभूती देणारे मोह फुलापासून बनवण्यात आलेले लाडू…. असे कितीतरी प्रकार शबरी नॅचरल्सच्या माध्यमातून अवघ्या जगाला मिळणार आहेत.आदिवासी संस्कृतीला जागतिक व्यासपीठावर नवी ओळख करून देण्यासाठी शबरी आदिवासी वित्त व विकास महामंडळाने पावले उचलली आहेत.

‘शबरी नॅचरल्स’ ही शबरी आदिवासी वित्त व विकास महामंडळाच्या व्यवस्थापकीय संचालक लीना बनसोड यांची संकल्पना. राज्यभरातून आदिवासी बांधवांनी हस्तकलेच्या माध्यमातून बनवलेल्या उत्कृष्ट उत्पादनांना जागतिक व्यासपीठ मिळवून आदिवासी बांधवांचे जीवनमान उंचावतानाच त्यांना आर्थिकदृष्ट्या सक्षम करण्याचे प्रयत्न शबरी नॅचरल्सच्या माध्यमातून सुरू आहेत. या महामंडळाच्या वतीने राज्यभरातील आदिवासी बांधवांच्या शेतकरी उत्पादक संघटनांना वित्तपुरवठा केला जातो. ‘शबरी नॅचरल्स’ या नव्या ब्रँडखाली बाजारपेठेत उत्पादने दाखल होत आहेत. ही सारी उत्पादने बहुतांश सर्वच ई-मार्केट प्लॅटफॉर्मवर उपलब्ध आहेत.
भाजपचे पराग शहा ठरले राज्यातील सर्वांत श्रीमंत उमेदवार; संपत्ती ५ वर्षांत दहापट वाढ, एकूण संपत्ती किती?
शबरी नॅचरल्स ब्रँडच्या माध्यमातून पौष्टिक अन्नपदार्थ ग्राहकांना उपलब्ध होत आहेत. या ब्रँडचे देशभरासह विदेशातही मार्केटिंग करून त्याला जागतिक दर्जा प्राप्त करून दिला जाणार आहे. पहिल्या टप्प्यात आम्ही ४० लाखांचे उद्दिष्ट ठेवले असून, लवकरच हा व्यवसाय कोट्यवधी रुपयांचा टप्पा गाठेल. – लीना बनसोड, व्यवस्थापकीय संचालक, शबरी आदिवासी वित्त व विकास महामंडळ
मोठी बातमी! पश्चिम रेल्वेचा नवा नियम, आता ट्रेनमधून अधिक सामान नेल्यास होणार कारवाई
जंगलात बाराही महिने रानमेवा उपलब्ध असतो, मात्र, यातून रोजगार उपलब्ध होऊन आर्थिक लाभ होईल, याचा स्वप्नातही विचार केला नव्हता, मात्र शबरी महामंडळाच्या माध्यमातून आमच्यासारख्या आदिवासी महिला व पुरुषांना रोजगाराची एक चांगली संधी मिळाली आहे. –दिपाली दोधाड, लाभार्थी महिला

शबरी’च्या माध्यमातून आदिवासींची कला, वस्तू व जंगलात उपलब्ध होणाऱ्या जिन्नस लाभाच्या कशा आहेत, याबाबत चांगल्या प्रकारे मार्गदर्शन करून आर्थिक सुबत्ता मिळण्यास मदत झाली. – सेवा नडगे, लाभार्थी महिला