जरांगेंनी दंड थोपटले, ओबीसी नेत्याची पहिली प्रतिक्रिया; म्हणाले, ‘१३५ आमदार पाडण्याचं काय झालं?’

मनोज जरांगे पाटील यांच्या निर्णयावर लक्ष्मण हाके यांनी प्रत्युत्तर दिले आहे. ‘मनोज जरांगे आज औकातीवर आले आहेत. एक मराठा लाख मराठा हे मतांचे मूल्य नसतेच मुळी,’ अशी टीका केली. तर हाकेंनी जरांगे पाटलांसमोर एक सवालही उपस्थित केला आहे. ‘१३५ आमदार पाडणार होते तुम्ही? काय झालं त्याचं,’ पवारांनी यांना डाफरले आहे, असे लक्ष्मण हाके म्हणाले.
मनोज जरांगेंच्या निर्णयाने महायुतीत चलबिचल! संतोष बांगरांचे टेन्शन वाढले, ताफा आंतरवालीत धडकणार
‘जरांगे कसले बाँड पेपर घेऊन तुम्ही बसले आहेत? तुम्ही शिलालेखावर लिहून घ्या हे लोक कुठल्याच गोष्टीवर ठाम नाहीत’ अशा शब्दांत ताशेरे ओढून हाके पुढे म्हणाले, मनोज जरांगे सुपारी घेऊन ते तुतारी वाजवणार आहेत. ते बारामतील मॅनेज झाले आहेत. तर जरांगे यांच्यामागे दलित आणि मुस्लीम समाज कसा जाणार?

यातच हाकेंनी उमेदवारी मागे घेण्यासाठी एक दिवस राहिला असल्याने जरांगे पाटलांवर टीकास्त्र डागले आहे. ‘जरांगे नावाचे वटवागूळ महाराष्ट्राच्या मानेवर बसलं आहे, ते उद्या ३ नंतर इतिहास जमा होईल’ असे मोठे विधान हाकेंनी केले. यावर आता मनोज जरांगे काय प्रत्युत्तर देतात हे पाहावे लागणार आहे. तत्पूर्वी जरांगेंनी राजकीय आखाड्यात उमेदवार उतरवल्याने महायुतीत मात्र चलबिचल सुरु झाली आहे. जरांगेंच्या या निर्णयामुळे राज्यातील राजकीय स्थितीवर कसा परिणाम होणार हे पाहणे देखील महत्वाचे असणार आहे.