अन्याय टोकाला गेला की गप्प बसायचं नसतं! ‘खऱ्या लाडक्या बहिणी’चा बॅनर लागला, शहरात एकच चर्चा

नाशिकमध्ये एका काळ्या बॅनरवर पांढऱ्या रंगात मजकूर लिहिण्यात आलेला आहे. हा बॅनर कोणी लावला, कशासाठी लावला, हे प्रश्न अद्याप तरी अनुत्तरितच आहेत. २० नोव्हेंबरला राज्यात विधानसभा निवडणुकीसाठी मतदान होणार आहे. त्या पार्श्वभूमीवर लावण्यात आलेला बॅनर नाशिकमध्ये लक्षवेधी ठरत आहे. नाशिककरांची ‘खरी लाडकी बहीण कोण?’ असा प्रश्न बॅनर पाहणाऱ्यांना पडला आहे.
BJP Maharashtra: भाजपचं नेमकं चाललंय काय? मित्रपक्षांच्या अडचणीत वाढ; ३ मतदारसंघांत ३ वेगळ्या भूमिका
नाशिकमधील त्र्यंबक परिसरात भलामोठा बॅनर लागला आहे. ‘अन्याय टोकाला गेला की गप बसायचं नसतं… म्हणूनच येतेय तुमच्या भेटीला लवकरच… तुमची खरी लाडकी बहिण’, असा मजकूर बॅनरवर छापलेला आहे. त्यामुळे ही खरी लाडकी बहीण नेमकी कोण, असा प्रश्न निर्माण झाला आहे. हा बॅनर विरोधकांच्या गोटातील कोणी लावला की सत्ताधाऱ्यांपैकी कोणी लावला, या प्रश्नाचं उत्तर अद्याप तरी मिळालेलं नाही. त्यामुळे उत्कंठा वाढली आहे.
काँग्रेसच्या वॉर रुममधून फोनाफोनी; ८ बड्या नेत्यांकडून मोहीम फत्ते, मविआला सर्वात मोठा दिलासा
त्र्यंबक परिसरात अज्ञातांनी लावलेल्या बॅनरची चर्चा सध्या परिसरात सुरु आहे. हा बॅनर संपूर्ण शहरात चर्चेचा विषय ठरला आहे. या बॅनरमधून नेमका कोणाला मेसेज देण्यात आलाय, कोणावर अन्याय झालाय, असे प्रश्न सामान्यांना पडले आहेत. जो तो आपापल्या परीनं याबद्दलचे तर्क मांडून कयास बांधत आहे. पण या बॅनरमागे नेमकं कोण या प्रश्नाचं उत्तर कोणालाही मिळालेलं नाही. बॅनरचा फोटो सोशल मीडियावर व्हायरल झालेला आहे. त्यामुळे चर्चेला आणखी उधाण आलेलं आहे.