भाजपनं समजावलं, विमान पाठवलं; तरीही फडणवीस समर्थकाची बंडखोरी कायम, विखेंचं टेन्शन वाढलं

शिर्डीतून भाजपनं राधाकृष्ण विखे पाटील यांना पुन्हा संधी दिली आहे. १९९५ पासून ते सलग सहावेळा शिर्डीतून विजयी झालेले आहेत. या कालावधीत त्यांनी तीनदा पक्ष बदलला. मुख्यमंत्री एकनाथ शिंदेंच्या मंत्रिमंडळात मंत्री असलेल्या विखेंविरोधात भाजपमधूनच बंडखोरी झाली. राजेंद्र पिपाडा यांनी उमेदवारी अर्ज दाखल केला. अर्ज भरण्यासाठी बैलगाडीतून जाणाऱ्या पिपाडा यांची समजूत काढण्यासाठी भाजपनं बरेच प्रयत्न केले. पण ते फोल ठरले.
बंडखोर ठाम, म्हणून अधिकृत उमेदवाराचीच माघार; मविआला कोल्हापुरात मोठा धक्का
राजेंद्र पिपाडा यांना भाजपनं तातडीच्या बैठकीसाठी मुंबईला बोलावलं होतं. त्यांच्यासाठी मुंबईतून खास चार्टर्ड फ्लाईट पाठवलं होतं. चार दिवसांपूर्वी पिपाडा यांना नेण्यासाठी विमान उतरलं होतं. पिपाडा चार्टर्ड फ्लाईटनं सपत्नीक मुंबईला गेले. त्याआधी त्यांनी विमानतळावर चार्टर्ड प्लेनसोबत फोटोही काढले. पक्षानं बरीच समजूत काढूनही पिपाडा निवडणूक लढण्यावर ठाम राहिले. त्यामुळे आता शिर्डीत तिरंगी लढत होईल.
…तर अमित ठाकरे विजयी होण्याची शक्यता अधिक; सरवणकरांनी बसल्या बसल्या मांडलं वेगळंच गणित
राजेंद्र पिपाडा उपमुख्यमंत्री देवेंद्र फडणवीसांचे कट्टर समर्थक मानले जातात. ते सातत्यानं फडणवीसांच्या संपर्कात असतात. पण त्यांचं आणि विखे पाटलांचे सूर कधीही जुळलेले नाहीत. दोघांमधील विळ्या-भोपळ्याचं नातं जिल्ह्याला माहीत आहे. गेल्या काही दिवसांपासून पिपाडा यांची काँग्रेसचे वरिष्ठ नेते बाळासाहेब थोरात यांच्याशी जवळीक वाढली.

राधाकृष्ण विखे पाटील यांच्या उमेदवारीला पिपाडा यांचा ठाम विरोध होता. त्यासाठी त्यांनी थेट पक्षश्रेष्ठींकडे पत्रव्यवहार केले. पण त्याचा काहीच उपयोग झाला नाही. त्यानंतर पिपाडा यांनी मतदारसंघातील जनसंपर्क वाढवला. गावभेटी सुरु केल्या. महाविकास आघाडीनं शिर्डीतून प्रभावती घोगरेंना तिकीट दिलं आहे. त्या काँग्रेसच्या उमेदवार आहेत.