राहुल गांधींच्या सभेत ‘लाल किताब’चं वाटप, कव्हरवर संविधान आत कोरे कागद, भाजपकडून जोरदार टीका

महाराष्ट्र विधानसभेपूर्वी घडलेल्या या घटनेनंतर आता भाजपला काँग्रेसला कोंडीत पकडण्याची संधी मिळाली आहे. भाजपने कोऱ्या कागदाचा हवाला देत त्याचा व्हिडिओ व्हायरल केला आहे.

पाहा व्हिडिओ –

काँग्रेस नेते विजय वडेट्टीवार यांनी भाजपच्या या आरोपांवर पलटवार केला आहे. वडेट्टीवार म्हणाले, ‘राहुल गांधींच्या नागपूर दौऱ्याला भाजप इतकी का घाबरत आहे? संविधान सन्मान परिषदेला उपस्थित मान्यवरांना नोटपॅड आणि पेन देण्यात आले. त्याच नोटपॅडचा व्हिडिओ बनवून असे बेताल आरोप करण्यात काही अर्थ नाही. राहुल गांधी नागपुरात आले तेव्हा भाजपवाले इतके घाबरले का? खोटी कहाणी तयार करणाऱ्यांनो, घाबरू नका. संविधान आणि राहुल गांधी तुमचे खोटे वेळोवेळी उघड करतील. ही तर सुरुवात आहे.

विजय वडेट्टीवार यांच्या ट्विटला भाजपने पुन्हा प्रत्युत्तर दिले आहे. भाजप म्हणाले, सत्य स्वीकारल्याबद्दल तुमचे खूप खूप आभार. राहुल गांधींच्या ‘बनावट संविधान’चा पर्दाफाश झाल्यानंतर विजय वडेट्टीवार त्यावर पडदा टाकायला आले आहेत. संविधानाचं कव्हर लावून त्याचा नोटपॅड म्हणून वापर करणे हा सुद्धा महापुरुष डॉ. बाबासाहेब आंबेडकर यांनी लिहिलेल्या राज्यघटनेचा अपमान आहे. काँग्रेसने याआधीही अनेकवेळा संविधान पायदळी तुडवले आणि आता संविधानाच्या आवरणाचा वापर नोटपॅडप्रमाणे केला जात आहे.

भाजपने काँग्रेसला विचारले की, ‘संविधानाचा वापर नोटपॅडप्रमाणे करताना तुम्ही तुमची बुद्धी गहाण ठेवली होती का? फक्त मुखपृष्ठ दाखवून जनतेची दिशाभूल करणे हा तुमच्या खोट्या कथेचा भाग आहे. याचे उत्तर महाराष्ट्रातील जनता २० तारखेला आपल्या मतांच्या माध्यमातून देईल.