नाशिकमध्ये PM मोदींची तोफ धडाडणार; आज महायुतीची जंगी सभा होणार, असे आहे नियोजन

मुख्यमंत्री एकनाथ शिंदे, उपमुख्यमंत्री देवेंद्र फडणवीस, अजित पवार यांच्यासह महायुतीचे बडे नेते या सभेला उपस्थित राहणार आहेत. गेल्या दोन विधानसभा निवडणुकांच्या पार्श्वभूमीवर मोदींनी भाजप उमेदवारांच्या प्रचारासाठी सभा घेतल्यानंतर उमेदवार निवडून आले आहेत. त्यामुळे नाशिकमध्ये होत असलेल्या सभेची भाजपने जय्यत तयारी केली आहे. महायुतीने जिल्ह्यातील १५ मतदारसंघांपैकी १४ ठिकाणी उमेदवार दिले आहेत. आता महायुतीच्या उमेदवारांच्या प्रचाराचा श्रीगणेशा करण्यासाठी थेट पंतप्रधान मोदीच नाशिकमध्ये येत आहेत. धुळे येथील सभा सकाळच्या सत्रात आटोपल्यानंतर दुपारी १२ वाजता पंचवटीतील तपोवनातील मैदानावर या जाहीर सभेचे आयोजन करण्यात आले आहे.

सकाळी ओझर येथे वायुसेनेच्या विशेष विमानाने मोदींचे आगमन होईल. त्यानंतर ते हेलिकॉप्टरने धुळ्यातील सभास्थळाकडे रवाना होतील. धुळ्यातील सभा आटोपल्यानंतर मोदींचे हेलिकॉप्टर नाशिकला छत्रपती संभाजीनगर महामार्गावरील नीलगिरीबागेतील हेलिपॅड येथे उतरेल. तेथून मोटारीने ते तपोवनातील सभास्थळाकडे जातील. या सभेला भाजपचे प्रदेशाध्यक्ष चंद्रशेखर बावनकुळे, राष्ट्रवादी अजित पवार गटाचे ज्येष्ठ नेते तथा मंत्री छगन भुजबळ, शिवसेना शिंदे गटाच्या नेत्या नीलम गोऱ्हे, अमर साबळे, मंत्री गिरीश महाजन आदींसह जिल्ह्यातील महायुतीचे सर्व १४ उमेदवार व्यासपीठावर उपस्थित राहणार आहेत. तब्बल एक लाखाहून अधिक लोक या सभेला उपस्थित राहतील, असा दावा भाजपकडून करण्यात आला आहे.
बंडोबांच्या तलवारी म्यान! नाशिक मध्य, पूर्व, पश्चिममध्ये तिरंगी; तर देवळालीत बहुरंगी लढत
मंत्री महाजनांकडून पाहणी
पंतप्रधानांच्या सभेची तारीख ठरल्यानंतर ग्रामविकासमंत्री गिरीश महाजन यांनी सभेची जबाबदारी खांद्यावर घेत तातडीने नाशिकमध्ये तपोवनातील सभास्थळाची पाहणी केली होती. सभेच्या नियोजनाबाबत विविध सूचनाही केल्या होत्या. त्यानंतर मंत्री महाजन यांनी गुरुवारी पुन्हा नाशिकमध्ये येत सभेच्या तयारीचा आढावा घेतला. भाजपच्या स्थानिक पदाधिकाऱ्यांना सूचना दिल्या. सभेची तयारी पूर्ण झाल्याची माहिती शहराध्यक्ष प्रशांत जाधव, लक्ष्मण सावजी यांनी दिली.
४९ आजी, ३४ माजी आमदार रिंगणात; विदर्भातील २० मतदारसंघांतील लढती रंगतदार, कोण कोणाशी भिडणार?
सभास्थळी येणाऱ्यांवर नजर
लोकसभा निवडणुकीवेळी पिंपळगाव येथे झालेल्या सभेत कांदा प्रश्नावरून मोदींच्या सभेत व्यत्यय आला होता. कांद्यावर बोला असे आवाहन एका शेतकऱ्याने केल्यानंतर सभेत गोंधळ निर्माण झाला होता. त्यामुळे विधानसभा निवडणुकीत असा प्रकार होऊ नये याकरिता सभेसाठी कडेकोट नाकाबंदी करण्यात आली आहे. मोदी यांच्या सभेसाठी पोलिसांनी ताकही फुंकून पिण्याचा निर्णय घेतला आहे. त्याचाच एक भाग म्हणून, सभास्थळी येणाऱ्यांवर बारीक नजर ठेवली जाणार आहे.