मालेगाव मध्य वगळता उत्तर महाराष्ट्रातील सर्व जागा महायुती जिंकेल; गिरीश महाजनांचा दावा

लोकसभेवेळी विरोधकांनी ‘फेर नॅरेटिव्ह’ सेट केल्याने आम्हाला फटका बसला. मात्र, विधानसभेत ‘फेक नॅरेटिव्ह’ चालणार नाही, असेही महाजन यांनी स्पष्ट केले. सदाभाऊ खोत यांनी शरद पवारांवर केलेल्या टीकेचे मी समर्थन करणार नाही. प्रत्येकाने संयम बाळगावा आणि टोकाची टीका करू नये, असा सल्लाही महाजनांनी खोत यांना दिला. देवळाली मतदारसंघाबाबत एकत्र बसून निर्णय घेऊ, असे त्यांनी स्पष्ट केले. पंतप्रधान नरेंद्र मोदी शुक्रवारी (दि. ८) नाशिक दौऱ्यावर येत आहेत. त्या पार्श्वभूमीवर महाजन यांनी नाशिकमध्ये येऊन मोदींच्या सभेच्या तयारीचा आढावा घेतला. त्यानंतर माध्यमांशी बोलताना महाजन यांनी राज्यात पुन्हा महायुतीचेच सरकार येणार असल्याचा दावा केला.

पंतप्रधान नरेंद्र मोदी यांच्या १४ नोव्हेंबरपर्यंत राज्यात जवळपास दहा सभा होणार आहेत. त्यामुळे राज्यातील राजकीय वातावरण महायुतीच्या बाजूने होणार आहे. लोकसभेला विरोधकांनी घटना बदलाचा ‘फेक नॅरेटिव्ह’ सेट केला. त्याचा फटका आम्हाला बसला. धुळे लोकसभा मतदारसंघात पाच ठिकाणी भाजप उमेदवाराला आघाडी होती. परंतु, मालेगाव मध्य या एकाच मतदारसंघात विरोधी मतदाराला दोन लाख मते मिळाल्याने निकाल फिरला. परंतु, विधानसभेला मात्र आता असे होणार नाही, असा दावाही त्यांनी यावेळी केली. या देशातून कोणालाही हाकलले जाणार नाही. विरोधकांकडून पुन्हा ‘फेक नॅरेटिव्ह’ सेट केला जात आहे. परंतु, या देशातून कोणालाही हाकलले जाणार नाही, असेही त्यांनी स्पष्ट केले. मालेगावमधील सहकारी बँकेतून काढण्यात आलेल्या पैशांबाबत चौकशी सुरू असल्याचेही त्यांनी यावेळी सांगितले.
Raj Thackeray: मनसेला सत्ता द्या, ४८ तासांत मशिदीवरचे भोंगे काढतो! वरळीतील सभेत राज ठाकरे यांची घोषणा
‘देवळालीबाबत लवकरच निर्णय’
राज्यात अनेक मतदारसंघांमध्ये बंडखोरी झाली असली, तरी महायुतीचेच आमदार निवडून येतील. काही ठिकाणी अपवादात्मक स्थितीत मैत्रीपूर्ण लढत होत आहे. नाशिकमध्ये देवळाली मतदारसंघात महायुतीचेच उमेदवार आमने-सामने आहेत. राष्ट्रवादी (अजित पवार गट) काँग्रेसची जागा असतानाही महायुतीतील शिवसेना शिंदे गटाने येथे उमेदवार दिला आहे. त्यामुळे येथे तीनही पक्षाचे नेते एकत्र बसून निर्णय घेतील, असा खुलासा महाजन यांनी केला. महायुतीत ज्यांनी बंडखोरी केली आहे त्यांच्यावर कारवाई होईल. त्यांना पक्षात ठेवले जाणार नाही, असेही महाजन यांनी यावेळी सांगितले.