‘आता शरद पवारांच्या तुतारीला मतदान नाही,’ लक्ष्मण हाकेंचा निर्धार, जरांगेंप्रमाणेच ‘पाडण्याचे अस्त्र’ उगारले

लक्ष्मण हाके म्हणाले, ‘जिथे वंचितचा उमेदवार नाही, ओबीसी आरक्षणाच्या विचाराचा उमेदवार नाही. तिथे आम्ही एकवेळेस भाजपला मतदान करु. मात्र, शरद पवारांच्या तुतारीला मतदान नाही. लोकसभा निवडणुकीमध्ये शरद पवार यांनी मनोज जरांगेंच्या आंदोलनाला पाठिंबा दिला आणि त्यांचे आंदोलन मोठे केले.’ यासोबतच ‘ओबीसी समाज यावेळेला महाविकास आघाडीचा करेक्ट कार्यक्रम करणार आहे. लोकसभेला झालेल्या पराभवाचा बदला विधानसभेला घेणार. यावेळी भलेभले तुतारीचे उमेदवार आडवे केल्याशिवाय ओबीसी राहणार नाहीत,’ अशा शब्दांत लक्ष्मण हाकेंनी हुंकार भरला आहे.
Ajit Pawar: दादांना ‘शरद पवार पॅटर्न’ची भुरळ, लोकसभेत गाजलेला फॉर्म्युला वापरणार; बंपर यश मिळणार?
तर ‘देवेंद्र फडणवीसांची क्षमता पाहावी. मराठा समाजातील तरुणांना रोजगार दिले असतील तर त्यांनी मुख्यमंत्री व्हायला विरोध का? फक्त ब्राह्मण आहेत म्हणून त्यांच्या मुख्यमंत्रीपदाला विरोध का? असा सवाल देखील लक्ष्मण हाके यांनी उपस्थित केला.

तर लक्ष्मण हाकेंनीा राष्ट्रवादी शरद पवार गटाचे उपाध्यक्ष भूषण सिंह होळकर यांच्यावर देखील टीका केली. ते म्हणाले, होळकरांचे वंशज म्हणून कोणालाही पवार सध्या उभे करीत असून रोहित पवार व प्रवीण गायकवाड यांच्या स्क्रिप्टवर चालणारा बाहुले आहेत. होळकरांचे वंशज अमेरिकेपासून रॉयल फॅमिली आहे. ती असल्या राजकारणापासून लांब राहतील असेही लक्ष्मण हाके म्हणाले. य़ावर आता शरद पवार गटाकडून काय प्रतिक्रिया येणार हे पाहणे महत्वाचे असणार आहे.

लोकसभा निवडणुकीआधी मराठा आंदोलन पेटले होते. आरक्षणाची मागणी पूर्ण न झाल्याने जरांगेंनी सत्ताधाऱ्यांना घेरले होते. त्याच प्रमाणे मराठा आरक्षणाला होणारा विरोध पाहता ओबीसी नेत्यांना देखील धारेवर धरले. त्यामुळे ऐन लोकसभा निवडणुकीत मराठा विरुद्ध ओबीसी संघर्ष निर्माण झाला. परिणामी महायुतीला मराठवाड्यात जरांगे फॅक्टरचा मोठा फटका बसला. आता विधानसभा निवडणुकीच्या वेळी दोन्ही समाजाचे नेते समोरासमोर आल्याने नेमका राजकारणावर परिणाम होणार हे पाहणे महत्वाचे असणार आहे.