नांदेडात रण तापले, सख्खे भाऊ भावाविरोधात प्रचाराच्या मैदानात, राठोडांसमोर मोठे आव्हान

हरीश राठोड हे दिवंगत आमदार गोविंद राठोड यांचे सुपुत्र आहेत. मागील २४ वर्षांपासून ते आपल्या कुटुंबीयांसह अमेरिकेत वास्तव्यास आहेत. पती-पत्नी दोघेही अमेरिकेत डॉक्टर आहेत. मात्र मागील काही वर्षांपासून भावा भावामध्ये कौटुंबिक कलह सुरु आहेत. चार भिंतीमधील कौटुंबिक वाद आता चव्हाट्यावर आला आहे. तुषार राठोड यांना हरवण्यासाठी हरीश राठोड हे थेट अमेरिकेतून मुखेडमध्ये दाखल झाले आहेत. अपक्ष उमेदवार संतोष राठोड यांच्या प्रचारार्थ आयोजित एका सभेत हरीश राठोड यांनी आमदार तुषार राठोड यांना पराभूत करण्याचे आवाहन जनतेला केले आहे. शिवाय त्यांनी आपले आमदार बंधू तुषार राठोड यांच्यावर देखील निशाणा साधला. आमदार तुषार राठोड हे मंजूर झालेल्या विकास कामाचे पैसे कमवण्यासाठी दुसऱ्याच्या नावाने गुत्तेदारी करत आहे. या चोराला पाडा, असे आवाहनच मोठ्या भावाने चक्क मुखेडच्या जनतेला केले. विशेष म्हणजे मोठ्या भावाने आमदार भावाला समर्थन न देता अपक्ष निवडणूक लढवत असलेला पुतण्या संतोष राठोड यांना पाठिंबा दिला आहे. विदेश वारी करुन परतलेले हरिश राठोड हे मागील आठ दिवसांपासून छोट्या भावाच्या विरोधात प्रचार करत आहे. त्यामुळे आमदार तुषार राठोड यांची धाकधूक वाढली आहे.
तुम्ही महाराष्ट्रातील सरकार पैशांच्या जोरावर चोरले; प्रियांका गांधींचा कोल्हापुरातून थेट PM मोदींवर हल्ला
दरम्यान मुखेड मतदारसंघात तिरंगी लढत पहायला मिळत आहे. भाजपकडून तुषार राठोड, काँग्रेसकडून माजी आमदार हणमंत पाटील बेटमोगरेकर, मुख्यमंत्र्याचे माजी सचिव बालाजी खतगावकर निवडणुकीच्या रिंगणात आहेत. यातच तुषार राठोड यांना आवाहन देण्यासाठी त्यांचा पुतण्या देखील मैदानात उतरला आहे. यामुळे जिल्ह्यातील राजकीय समीकऱण कोणते वळण घेणार, याकडे सर्वांचे लक्ष लागले आहे.